Ataatsimut isigalugu maannamut ataatsimiititaliap sulisimanera Siumup iluarisimaarpaa, aamma apeqqutit Siumumit Inatsisartutigoorlugit qaqinneqarsimasut naammaginartumik akineqarsimasut Siumut naliliigallarpoq
All: Karl Tobiassen, Siumup gruppiata siulittaasuat
Parisimi isumaqatigiissut pillugu Siumup qanoq ullumikkut inissisimanera assigiinngitsunit pissusissamisoortumillu ujartorneqartarpoq, pingaartumik Inatsisartuni siullermeerneqarneranut atatillugu Siumup annertuumik paasiniagassaqaqqaarneranik piumasaqaateqarsimanerata kingunerisaanik.
Apeqquterpassuit tamakku pissutaaqataallutik Inatsisartuni isummerfigisassaq upernaammi ataatsimiinnermiit ukiamut ataatsimiinnermut kinguartinneqarpoq, Siumup piumasaqaatai qulaajartikkusutat aamma Naalakkersuisooqatigiinnermi isumaqatigiissummi Siumup piumasaqaatai tunngaviullutik.
Apeqqut inaarutaasumik Inatsisartuni immikkoortoq 60-itut isummerfigineqassaaq novembarip 14-iani, naatsorsuutigineqarporlu Eqqissisimatitsinermut Avatangiisinullu Ataatsimiititaliap isumaliutissiissutini tamassumap nalaanittaaq naammassisimassagaa.
Ataatsimut isigalugu maannamut ataatsimiititaliap sulisimanera Siumup iluarisimaarpaa, aamma apeqqutit Siumumit Inatsisartutigoorlugit qaqinneqarsimasut naammaginartumik akineqarsimasut Siumut naliliigallarpoq.
Taamaattoq Inatsisartuni siullermeerneqarneraniit allanngortoqarsimavoq. Naalakkersuisut nutaamik arlaannaanulluunniit attuumassuteqanngitsumik pineqartumut ilisimasalimmik nalilersuisitseqqissimapput, pineqarluni Naalagaaffiup eqqartuussissuserisuata Inatsisartuni siullermeerneqarneranut atatillugu naliliisimanerata nalilersorteqqinneqarnera. Taannalu ilanngulluguttaaq Siumup apeqqummut sulinini ingerlappaa, Siumullu naatsorsuutigaa ataatsimiititaliap inaarutaasumik isumaliutissiissummini apeqqut taanattaaq tikissagaa.
Isumaqataannginnerup tunngavia
Parisimut isumaqatigiissummut maannamut Siumup nangaannartoqartitsisimaneranut pissutaasut arlaqarput, ilaatigut pineqarlutik Inatsisartut avaqqullugit isumaqatigiissut nunatsinnut atuutsilersinneqarsinnaanngitsoq, ilisimasassavut tamakkiissut piginagit kingunissaallu ilisimaqqissaarnagit ilanngutitinneqarsinnaanngitsugut aamma inuussutissarsiornitsinnut akornutaasinnaasut tamakkiisumik ilisimasariaqarivut.
Tunngaviusumik Siumut Parisimi isumaqatigiissummut akerliunngilaq. Silaannatsinnik mingutsitsinnginnerunissaq Siumup tapersersorpaa. Ilanngutitinneqarnissatsinnulli uatsinnut piumasaqaataasussat tamakkiisumik ilisimalernissaat Siumumut pingaaruteqarsimavoq. Inatsisartuni inaarutaasumik isummerfigineqannginnerani apeqqutit tamakku naammaginartumik akineqarsimanissaat pisariaqarpoq, taamallu massakkut inissisimasoqartoq Siumup nalilerallarpaa.
Assersuutigalugu apeqqutinut ilaapput aquuteralaat batteriinik ingerlatitsisoqalersinnaanissaannut isummersuutit nunattalu aningaasarsiornerata siuarsarnissaanut akornusersuilinnginnissanut tunngassuteqartut.
Paasissutissat
Siusinnerusukkut Siumup apeqqummut isummertarsimaneri ukunani atuarneqarsinnaapput:
.
