Siumut partiitut pilersinneqarpoq ulluni 28., 29. aamma 30. juli 1977 Upernaviarsummi Qaqortup eqqaani.

Naalakkersuinikkut suleqatigiiffiuvoq inuianni kalaallini sorlaqartoq. Suleqatigiiffiup tunngavilersimavaa Danmarkip nunatsinnik nunasiaateqarnerata aaqqissukkamik illuatungilersorneqarnera.

Siumup tunngaviusumik eqqarsartaaserinngilaa inuiaqatigiit aaqqissugaanerata aalajangersimasup qaqugorsuarmut atortuujuarnissaa.

Inuiaqatigiit naqisimaneqanngitsut, eqeersimaartut suleqatigiittullu tassaapput naalakkersuinikkut aningaasaqarnikkullu demokrati tunngavigalugu tamakkiisumik illersugaasut.

Atugarisatigut naapertuilluarneq, assigiimmik naleqassuseq, kulturikkut naqisimaneqannginneq killilersugaanngitsumillu suliniuteqarsinnaaneq tassaapput inoqatinik pitsaasumik isiginnittaaseqarnermut sorlaasut.

Allanik suleqateqarsinnaaneq oqaloqateqarsinnaanerlu politikkikkut aaqqissugaanitsinni immikkut pingaaruteqarput, tamatumuunami innuttaasut assigiinngitsut akornanni naalakkersuinikkullu isummat assigiingitsut akornanni sakkortuumik assortuunneq pinngitsoorsinnaagatsigu.

Ersarissunik anguniagaqarneq aqqutaanilu naaperiaanissamut piumassuseqarneq siunertap ataatsip iluaniipput. Tamatuma kinguneranik suleqatigiiffimmi ilaasortat oqartussaaqataanerat annertuumik pingaaruteqarpoq.

Naalakkersuinikkut suleqatigiit tapersersorteqarluartut, aalajaatsumik isummertaasillit ersarissunillu anguniagallit nukissaqarluarnerpaapput allat suleqatiginiarnissaannut.

Siumup anguniaarpaa nunami inuiaqatigiit atugarissaartut, ataatsimoortut, naleqqussallaqqissut, ineriartortitsiuartut, avatangiisinut ataqqinnilluinnarlutik avatangiisip tunniussinnaasaanik atorluaasut nunarsuarmioqataanermilu peqataallutik ingerlasut.

INUK TATIGALUGU – SIUNISSAQARNEQ UPPERALUGU
Siumup siunertaani tunngaviuvoq socialisme demokratimik tunngavilik. Siumup anguniarpaa inuup kiffaanngissuseqartitaanissaa, qulakkiissallugu toqqissisimalluni naqisimaneqaranilu nammineerluni inuunermi akisussaassuseqartumik aalajangiiffiginissaanut periarfissaqartitaanissaa, peqatigiinnermut tunngatillugu, pinngortitamut tunngatillugu, kinguaariinnullu aggersunut tunngatillugu akisussaaqataasutut misigaluni.

Inuup naleqassusia ataqqisariaqarpoq. Taamaattumik illersugaraagut inuiaqatigiit inatsisinik tunngavillit inuillu pisinnaatitaaffii tunngaviusut.

Innuttaasoq kinaluunniit aalajangeeqataasinnaatitaasariaqarpoq nammineq ulluinnarni inuunerminut inuiaqatigiillu sutigut tamatigut aaqqissugaanerannut. Angorusuppagut inuiaqatigiit kikkunnut tamanut ammasut kikkunnillu tamanik atorfissaqartitsisut.

Siumup inuup kiffaanngissuseqarnissaanik piumasaanut atalluinnarput kikkut tamarmik suliffissaqarnissaat, Nunatsinni aningaasaqarnikkut naapertuilluartumik ingerlatsineq kikkullu tamarmik inuiaqatigiit ajunngitsorsiassaannut naligiimmik periarfissaqartitaanissaat.