Parisimi isumaqatigiissut Inatsisartunut apuunneqarani atsiuinnarneqarpoq

Naalakkersuisut siulittaasuat novembarip sisamaani tusagassiuutinut oqarpoq, Parisimi isumaqatigiissutip atsiorneqarnissaanut tunngatillugu Inatsisartut ilisimatinneqarsimasut. Tamanna ilumuunngilluinnarpoq

All.: Vivian Motzfeldt, Siumut sinnerlugu Inatsisartunut ilaasortaq

Naalakkersuisullu pineqartumut suleriusaat akuerineqarsinnaanngilluinnarpoq, pingaartumik isumaqarsimagunik Inatsisartut ataatsimiititaliaanut – Nunanut Allanut Sillimaniarnermullu Ataatsimiititaliamut aamma Eqqissisimatitsinermut Avatangiisinullu Ataatsimiititaliamut –  isertortumik allanullu takuneqaqqusaanngitsumik oktobarip 28-ani allagaqapallannikkut Inatsisartunik pituttuisoqarsinnaasoq.

Pineqartoq Inatsisartuni eqqartorneqarsimanngilaq. Ilisimanngilarput suut tunngavilersuutigalugit, isumaqatigiissummilu suut atuuttussaatinnagit nunarput maanna pituttorneqalernersoq. Pineqartoq inuiannut kalaallinut imaannaannani inissisimavoq, tassami mianersoqqissaarnata iluareqqusaarlutalu Parisimi isumaqatigiissummut inuiaqatigiittut pituttorneqassagutta, aningaasarsiornikkut ineriartornissarput annertuumik innarlerneqarsinnaavoq.

Qanorluunniit nunatut ineriartortutut suli inissisimavugut, aamma namminersulersimanerput suli ima ineriartortissimatiginngilarput, sutigut tamatigut inuiattut kiffaanngissuseqarnerput pigilersimallutigu – taamaaqqajanngilaq. Suli naalagaaffiup ungalusimasaani inuuvugut. Naammattumik namminiussuseqartigata, inuussutissarsiornikkut ineriartorfissatuarisavut inuiassuarnut pituttorneqarnertigut aanngartinneqassanngillat.

Siumumilu tamannarpiaq isumakulunnartutut isigaarput. Inuiaqatigiittut inuiattullu uagut ineriartornissatta killilersorneqalinnginnissaa allanit pingaarnerujussuulluni inissisimavoq.

Suliassarlu taanna Naalakkersuisut isertortumik ataatsimiititalianut nalunaaruteqarnerisigut naammassineqarsinnaanngilaq. Uukapaatitsineruvoq siunertamigut sammiveqanngitsoq.