Siumumit nuannaarutigisatsinnik partiit Siumut, Inuit Ataqatigiit, Atassut, Attaviitsoq Nalerarlu ullumi atsioqatigiipput, isumaqatigiissutigalugu Aningaasanut Inatsit 2024-imut atuuttussaq qanoq iluseqassanersoq
All.: Doris J. Jensen, politikikkut oqaaseqartartoq
Aningaasanut Inatsit partiinit amerlanerussuteqarluartunit tunuliaqutserneqartoq ullumi naammassineqarpoq, Siumullu pisarnermisut Nunatta aningaasaqarneranut akisussaaffimmik tigusivoq. Tamanna partiittut akisussaaffeqartutut Siumup pingaartitaraa, ataanilu pingaartillugit ukioq manna anguniarsimasatta ilaat taakkartulaassavakka.
Utoqqarnut pilersuisussaatitaanerup atorunnaarsinneqarnera angusaavoq pitsaasoq, utoqqarnullu ataatsimut aaqqiissuteqarnissaq suli sulissutigineqarpoq, unalu alloriarnerit siulleraat. Siumut isumaqarpoq suli suliassaqartugut, pingaartumik pisartagarisaasa naleqquttumik aaqqiissuteqarfiginissaanut tunngatillugu iliuuseqartariaqartugut isumaqaratta.
Peqqinnissaqarfik amerlanerusunik aningaasaliiffigineqarpoq, Siumumullu pingaarnerusimasoq unaavoq, assaat sulisinnaasut tunngavigalugit aningaasaleeqqinnerit ingerlanneqassasoq, saniatigullu ataavartumik peqqinnissaqarfitta napparissiteqqinnissaanut Naalakkersuinikkut suliniutit ataatsimoorfigineqarlutik ingerlanneqassasut.
Sulinngiffeqarnermut atatillugu sulisitsisumit akiliunneqarluni angalasarnerup akileraarusersorneqarunnaarnissaa Siumup iluarisimaarpaa, pingaartumik sulisartukkormiunut oqilisaassussisinnaanera qularutiginnginnatsigu.
Meeqqat angerlarsimaffiup avataanut inissinneqartartut angajoqqaarsiaasa paaqqutaminnut isumassuinikkut angajoqqaatulli atugassaqarnerulernissaanut alloriarnerit siulliit tiguneqartut Siumup iluarisimaarpai, aamma suliassaq tamatta inuiaqatigiittut kivittariaqaratsigu naammaginartumik pingaartumik meeqqanut pineqartunut atugassaqartitsinertigut.
Mittarfeeqqat sioraannallit Aningaasanut Inatsimmut ikkuteqqinneqarnerat Siumup iluarisimaarpaa, aamma angallannikkut siunissami akikillisaataasinnaasutut isigigatsigit, minnerunngitsumik nunatta ataqatigiinnerusumik angallannikkut aaqqissuunneqarnissaanut aqqutissaammat avaqqukkuminaatsoq.
Erngup nukinganik nukissiorfiit ineriartortinnissaat nangittumik aningaasalersorneqassapput, pineqarlutik Aasiaat aamma Qasigiannguit – minnerunngitsumik Tasiilami nukissiorfiup ineriartorteqqinnissaa ilanngullugu.
Tasiilami aalisarnermik ineriartortitseqqinneq aningaasaliiffigineqarpoq minnerunngitsumillu Aalisartut, piniartut savaatillillu silap pissussanik eqqugaappata ikiorserneqarsinnaanngornissaat aqqutissiuunneqarmat Siumumit iluarisimaarparput.
Qimusserluni unammiuaartarnerit Aningaasanut Inatsimmi aammaarluni qaffaavigineqarput, maanna ukiup tullianut millionit pingasungajaat immikkoortinneqarlutik. Tamanna Avannaata Qimussersuanut Siumup illersuineranut takussutissat ilagaat, angusarlu immikkut nuannaarutigaarput nalunnginnatsigu, aappaagu Nunatta Kangiamiut ilanngullutik unammeqataassussanngortut.
Tusagassiuutit atugaasa pitsanngorsarneqarnissaat siunertaralugu politikikkut naaperiaassuteqarnissaq Siumup qaqilersimavaa. Taanna Inatsisartut oqaluttarfiatigut Siumup arlaleriarlugu oqariartuutigisarsimavaa, suliniutillu ineriartortinneqassasoq siunniunneqarmat Siumut naammagisimaarinnippoq.
Siumup pisarnermisut pissakinnerusut sulisartullu pillugit sulisimavoq sulilu pitsanngorsaavigineqarnissaat sulissutigissagatsigu qularutigineqassanngilaq. Ilutigisaanik inuussutissarsiornikkut siuarsaatissat aallartitassallu pitsaasumik periarfissinneqarnissaat eqqumaffigissagatsigu qularutigineqassanngilattaaq.