Kommuneqarfik sermersuumi Siumut gruppiani aammalu attaviitsoq Storm Ludvigsen teknikikkut suleqatigiiffigilikkamini 2024-imut aningaasaqarnermut isumaqatiginninniarnitsinni angusat aallaavigalugit marlunngornermi novembarip arfineq aappaani atsisoqatigiipput
All.: Dorthe-Marie Mogensen-Fontain, Siumup gruppiata siulittaasua
Siumumiit attaviitsumiillu angusagut nuannaarutigingaarpagut. Innuttaasut pillugit piunerput naqissuseqqillugu, innuttaasunut sullissineq pitsaanerulernissaanut suliniutit aallartinneqarnissaat tamanit anguneqarmat.
Illoqarfiit pingaarnersaanni ineqarniarnermik ajornartorsiuteqarneq ilisimaarilluarparput taamaattumillu inissianik innuttaasunut akilersinnaasunik pilersitsinissaq aamma anguniartuarlugu.
Nuannaarutigaarpullu tamannattaaq aamma angusaqarfigigatsigu.
Utoqqaat illuini sulisussarsiornermi atorfimmut atatillugu ineqarsinnaanissaq angusaq tulluusimaarutigaarput. Sulisut amerlinissaanut angerlarsimaffik pingaaruteqarluinnarmat ulluinnarni sulinissamut nukissamik aallerfiusarmat. Taamaattumillu atorfimmut tunngatillugu ineqartitsisinnaanissamut sulisunik ataavarnerusunik utoqqartatsinnut tunniunnissaa qulakkeerumallugu.
Kommunerujussuarmi illoqarfiit kinguussaaqqasutut aammalu oqartussaaffimmik arsaagaasimasutut misigisimajunnaarnissaannut iliuusissanittaaq isumaqatigiissuteqarnerput nuannaarutigaarput. Oqartussaassuseqarnerulerneq annertuumik akisussaaqataanermik aammalu kivitseqataarusussusermik pilersitsinissaanut siunnerfeqaleratta.
Uanilu takuneqarsinnaapput isumaqatiginninniarnermi qaqissimasagut:
Ingerlatsinermi pitsanngorsaatissatut siunnerfigaagut uku:
- Meeqqanut ilaqutariinnullu suliniutit annertusarneqarnissaat
- Meeqqat inuusuttullu ersinngitsumik innarluuteqartut misissuiffigineqarnissaat
- Siusinaartumik pinaveersaartitsinermi susassaqartut siunnersuusiortinnissaanut aaqqissuussineq
- Utoqqaat illuini sulisunut inissaqartitsineq
- Majoriami suliffissarsiortut inuttut inerikkiartornermut tunngasunik sammisaqartarnissaat.
- Saaffiginnittarfinni innuttaasut sullissivianni internetimut attaveqaat
- Nunaqarfinni inuunerissaarnermut pitsanngorsaatsit soorlu Helsekabiner
Sanaartugassani isumaqatiginninniarnermi Siumumit qaqinneqartut:
- Inissiat Nuummi innuttaasut akissakinnerusunut naleqquttut
- Inissiat inuusuttunut Paamiuni Kuummiuni Sermiligaanilu
- Qeqertarsuatsiaani inissiat ilaqutariinnut
- Paamiuni Minibus
- Sannaviit sinerissamiittut pitsanngorsarnissaat
- Najugaqarfik innuttaasunut immikkut pisariaqartitsisunut
- Nunaqarfinni qassaavittaarnissamut, imermik tunioraavik osmoseanlæg
Taamaattumik nuannaarutigingaarparput Siumumiit siunnerfigut aammalu pitsanngorsaatissatut siunnerfigut naapinneqarmata. Atsioqatigiinnerlu pisinnaalerluni.
Siumumiillu nuannaarutigingaarparput nunaqarfinni illut sullivinni akigititaasut aaqqiivigineqarmata. Taamatuttaarlu anartarfiit annittakkanut akigititat affaannanngortinneri anguneqarmat.
Siumumiit ukiut kingullerni isumaqatiginninniartarnerni periusissamik nutaamik ujartuisarsimanerput ukioq manna iluatsilluartutut nalilerparput.
Innuttaasunut sullissineq taamaasilluni siammasinnerusoq anguneqarpoq.