Kommunit namminersortuunerat Siumup aallartinnerminiilli ataqqisaraa tamaaginnarnissaalu sulissutigiuassallugu. Siumup anguniarpaa kommunit aningaasaqarnikkut suliassatigullu namminersortuunerisa ineriartortinnissaat, kommuninik aaqissuusseqqinnermi pilersaarusiaasimasut isumaqatigiissutillu nutaat naapertorlugit.
Kommuunit ataatsimut kattussuutillugit Kommuunerujussuarnik pilersitsinerup kingorna paasinarsivoq Tasiilap Ittoqqortoormiullu Sermersuup Kommuunianut ilaatsinneqalernerat sorpassuartigut kangiani najugaqartunut nukillaarsaataasoq. Nunatta kangia ineriartoqqittariaqarpoq innuttaasut kinassuseqarnerat nammineersinnaanerallu pingaartilluigit. Taamaammat Nunatta kangiata immikkut Kommuuninngortinissaa Siumup sulissutiginiarpaa.
Kommuuninut politikkimut tunngaviusumik Siumup siunertatut angunigarai:
- Nunatsinni najungaqarfiit nalingiimmik ingerlanneqassapput.
- Nunatsinni sumiluunniit najugaqaraluarutta pitsaasunik atugaqassaagut.
- Najugaqarfiit tamarmik ineriartortitsinissamut ingerlatseqataasinnaanerat Naalakkersuinikkut qulakkeerneqassaaq.
- Nunatsinni sumiiffiit ineriartortissallugit kajuminnarnerusariaqarpoq, najugaqarfigissallugit aningaasatigullu piorsassallugit. Illoqarfik pingaarneq, illoqarfiit allat immikkoortortallu tamarmik ilisarnaateqarput, nukittuffeqarlutik ineriartornermullu periarfissaqarlutik.
- Kommuunini kiffartuussineq, suliffissaqarneq aningaasatigullu atuagassarititaasut naligiinnerunissaat anguniarlugu ineriartortitsineq ingerlanneqassaaq.
- Kommuunit ineriartornissaannut suliniuteqarnermi kommunerujussuup aningaasatigut, isumaginninnikkut avatangiisitigullu nammineq napatissinnaanissaa anguniarneqartassaaq.
- Kommuunit nukittuffii ineriartornissamullu periarfissai aallavigalugit ineriartortitsineq ingerlanneqartassaaq.
- Kommunalbestyrelsip aaqqissugaanera nalilersoqqinneqartariaqarpoq.
- Kommuunini ineriartortitsinermut suliniutit kommunimi najugarisanilu piginnaasat nukittuffiillu aallaavigalugit ingerlanneqartassapput.
- Kommuuninik ineriartortitsineq siuarsarneqartassaaq Namminersorlutik Oqartussat, kommunit, suliffeqarfiit, suliniaqatigiiffiit allallu ataqatigiissaarnerisigut.
- Pisortat ingerlataanni namminersortuni siulersuisulersuisarnermi kommuni sumiiffigisaata siulersuisuni immikkut inissaqartinneqartariaqarpoq.
- Ineriartornermut arlalippassuartigut Kommunerujussuit akisussaapput, taamaattumik kommunerujussuit suliassat akisussaaffiillu annertuut isumaqatigiissutit tunngavigalugit ingerlateqqissavaat.
- Kommuunit pisussaaffigaat nunaqarfinni aqutsisut annertunerpaamik nunaqarfimminnut tunngasunut akisussaaffilissallugit.
- Nunaqarfiit pillugit Nuummi 2017 ataatsimeersuarnermi anguniakkat ingerlariaqqinnissamut innersuunneqarput.
- Kommunerujussuit kattuffeqalertariaqarput.
Kommunerujussuarnik naleqqussaaqqissinnaaneq kommunerujussuarmi innuttaasut amerlanerussuteqartut piumasarippassuk aammalu tamanna kommunalbestyrelsip isumaqatigiittup piumasarippagu Siumup ammaffigaa. Siumup qulakkeerniarpaa kommunerujussuit imminnut napatissinnaalernissaat, kommunerujussuit immikkuullarissusaat, naleqassusaat nukittoqutaallu aallaavigalugit. Kommunerujussuarni inuussutissarsiornikkut ineriartortitsinissami tunngaviuvoq uumassusilinnik uumaatsunillu atorluaanerulernissarput. Kommunerujussuit namminneerlutik nunanik allanik suleqateqarnissamut periarfissatik naapertorlugit inuutissarsiornikkut allatigullu ineriartortitsinerminni suleqateqartarnerat pissusissamisoorpoq.