Inuiaat Kalaallit qoqassiniarneqassanngillat

Parisimi isumaqatigiissut Inatsisartut avaqqullugit – Aningaasanullu Inatsimmut ilanngutitillugu –  Inuiannut Kalaallinut qoqassiilluni pituttuisunngortinniarnera Siumup akuerinngimmagu, Aningaasanut Inatsisissatut siunnersuummi Siumut isumaqatiginninniarnernit anisitaavoq

All.: Erik Jensen, Siumup siulittaasua

Aningaasanut Inatsisissaq pillugu isumaqatiginninniarnerit arfineq-marluk Siumup peqataaffigisimareerlugit, anguniakkallu ersarissut Siumup pingaartilluinnarlugit oqariartuutigisimasai kissaatitut oqaloqatigiilluarnermik Naalakkersuisunut apuussiffiusareersut, unnukkut novembarip 17-iani Aningaasaqarnermut Nunamullu Namminermut Naalakkersuisoq Siumup siulittaasuanut, Erik Jensenimut nalunaaruteqarpoq, Parisimi isumaqatigiissut Aningaasanut Inatsisissamut ilanngullugu isumaqatigiissutigineqarsinnaanngippat, Siumut isumaqatiginninniarnernit anisimasutut naatsorsuunneqassasoq.

Siumup naliliinera naapertorlugu, isumaqatiginninniarit ingerlanneqartut naammaginartumik ingerlanniarneqarsimapput. Siumumiillu kissaatigut ersarilluinnarsimapput. Ullumili marlunngornermi kingullermik naapinnermi ilaatigut Parisimi isumaqatigiissut Naalakkersuisut Siulittaasuata atsiorsimasaa Inatsisartunilu suli eqqartorneqaranilu, isummersorfigineqaranilu akuerineqarsimanngitsoq, akuerineqartussanngorlugu Naalakkersuisut qoqasseeriarnerat Siumup uparuarpaa – Siumup tamat oqartussaaqataaneranik Inatsisartoqarneranillu illersuimmat, anisitaavoq.

Tamanna soorunami akuerineqarsinnaanngimmat, Siumup aalajangiusimavaa Parisimi isumaqatigiissut sorpassuartigut maannamut imarisaanik erseqqinnerusumik ilisimaneqanngitsup, nunatsinnut imaannaanngitsumik pituttuisunngorsinnaasoq, aningaasarsiornitsinnullu annertuumik sunniuteqarsinnaasoq, Inatsisartut isummersimatinnagit akuersisimatinnagillu atuutsilersinneqarsinnaanngitsoq.

Qanorluunniillu Inatsisartut avaqqullugit – Aningaasanut Inatsimmut atatillugu piumasaqaatinnguinnarlugu – atuutsilersinneqarsinnaanngilaq! Tupinnaqaarlu Naalakkersuisooqatigiit, Inuit Ataqatigiit aammalu Naleraq, tamat oqartussaaqataaneranik suusupaginnillutik inissisimalersimammata aamma qaammaassaqarnerorpasinngimmata, Inatsisartunullu ataqqinninnginnerummata.