Piniarneq

Siumup sulissutigaa piniarneq piujuaannartitsineq tunngavigalugu ineriartortinneqassasoq, kulturerput  ataqqillugu. Piniarnermik inuussutissarsiuteqartut tapersersorneqassapput, inuussutissarsiutit nutaat periarfissaralugit, kinguaariillu tullii nangitsisinnaaqqullugit.

Piniarneq Kalaallit kulturiannut tunngaviusut ilagaat, taamaattumillu piniarnermik inuussutissarsiuteqartut nunatsinni illersugaallutillu ikorfartorneqassapput. Piniarneq piujuaannartitsinermut tunngavoq. Siumup sulissutigaa, kinguaariit piniagassanik atuinissamut periarfissaqartuarnissaat, aamma inuussutissarsiutigalugu piniarneq ingerlanneqartuarsinnaasutut qulakkeerneqarsimanissaa.

Piniarneq ingerlanneqassaaq kalaallinit nunaqavissunit, piniarnermik inuussutissarsiuteqartunut tapertaqartunullu salliutitsilluni. Piniartuuneq iluaqutigalu isertitaqarnerulernissaq anguniarlugu, takornarianik akiliisitsilluni tammajuitsussanik piniartitsisarneq periarfissaasaaq.

Piniagassat killilersukkat nunat inoqqaavisa pisinnaatitaaffii tunngavigalugu agguaanneqartassapput. Pisassiissutit immikkut ittut aningaasarsiornikkut ilungersunartumik inissisimasunut, neqissaqarniarnikkulluunniit amikkitsiffiusunut salliutitsilluni agguaaneqartassapput.

Silap pissusaata allanngoriartornerata ilutigalugu piniarfiusartut ikiliartunngikkunik ajornartorsiornarnerujartorput. Piniartut illersorniarlugit tapertaralugu allanik suliaqarallarsinnaanerat aqqutissiuunneqassaaq, sulinermi isertitat piniartutut isertitanut akornutaajunnaarsillugit (atuuttoq: isertitat 50 %-ii piniarnermit isertinneqarsimassapput). Piniarnermik inuussutissarsiuteqartunut, piumasunut tamakkiisumik aalisarnermut ikaarsaarnissaq periarfissatut qulakkeerneqassaaq.

Piniartukkormiut ilisimasaannik kinguaariit tulliinut ingerlatitseqqittarnissaq inuiaqatigiittut qulakkiissallugu pisussaaffigaarput, tamakkulu meeqqat atuarfiat aqqutigalugu sammineqartassapput.

Arferit, puisit assigisaasalu tamakkiisumik atorluarneqarnissaat anguniarlugu nutaanik piniariaatsinik tunisassioriaatsinillu ineriartortitsinissaq pisariaqarpoq. Pisortat aamma susassaqartut suleqatigiillutik ineriartortitsinissaat ataavartumik sulissutigineqassaaq.

Puisit amiinik tunisassiorneq pitsaanerusumik akilersinnaasumillu ingerlanneqassaaq, pitsaassutsimik salliutitsilluni. Siumup anguniarpaa ameerniat akitigut pitsanngorsaavigineqarnissaat. Tuttut umimmaallu pillugit tunisassiorneq ineriartortinneqassaaq, suliffissaqartitsisumik pitsaasumillu tunisassioriaatsimik pilersitsinikkut.

Kalaaliminernik tunisassiorneq ineriartortinneqassaaq, immitsinnut inuussutissatigut pilersornerunissarput siunertaralugu. Tunisassiorfiit tuniniaaffiillu pitsanngorsaavigineqassapput, aamma pisortanit aningaasaliissutit siunertamut atugassat ikiliartortinneqassanngillat.

Piniarnermik nakkutilliineq annertusarneqassaaq. Takornarianik akiliisitsilluni piniartitsisarneq ingerlanneqassaaq, piniarfinnik mianerinninneq tunngavigalugu.