Piniakkanik atuineq piujuaannartitsinermik tunngaveqarluni ingerlanneqassaaq, kinguaariit piniagassaqartuarnissaat qulakkeerniarlugu siunissamilu piniartutut inuuniuteqarnerup ingerlaqqissinnaanera tassuunakkuttaaq qularnaarniarlugu. Tamannalu anguniarneqassaaq pisuussutit uumassusillit nerisareqatigiiaat aallaavigalugit illersuinikkut.
Piniagassanik atuineq ingerlanneqassaaq piniarnermik inuutissarsiuteqartut tapertaqartullu nunaqavissut salliutillugit. Piniartut aningaasarsiornerisa annertusarneqarnissaat siunertaralugu aningaasaateqarfimmik pilersitsisoqassaaq, takornarianik akiliisitsilluni tammajuitsussanik piniartitsisarneq piniartunit ingerlanneqarnerulernissaa piviusunngortissinnaajumallugu.
Silaannap allanngoriartornera pissutigalugu avannaani piffissaq piniarfiusaraluartoq annikillinikuuvoq, tamanna pillugu piniartut ilungersunartumik inissisimasarput.
Piniartut illersorneqarnissaat eqqarsaatigalugu piniarnermut allagartallit sumiiffinni ataasiakkaani, piffissanilu aalajangersimasuni, piniarneq aalisarnerlu avataani sulliffeqarsinnaanissaq periarfissinneqassapput. Ukiukkut kaperlannerani allamik suliffeqarsinnaaneq periarfissaassaaq, piniarnermut allagartaq annaanagu.
Arferit puisillu neqaasa, orsuisa, puisillu amiisa sapinngisamik tamakkiisumik atorluarneqarlutik nioqqutissiarisalernissaat anguniarlugu piniariaatsinik nioqqutissioriaatsinillu nutaanik iluarsartuussisoqartariaqarpoq pisortat kattufiillu suleqatigiinnerisigut.
Puisit amiinik tunisassiornerup imminut akilersinnaanerusumik pitsaasutimillu pingaartitsisumik ingerlanneqarnissaa sulissutigineqassaaq, sapinngisamik nunarput tamakkerlugu ingerlatsiviusumik.
Piniakkanut killilersukkanut Nunap inoqaavisa pisinnaatitaaffii piniarnermut ileqquusut ilisimasaallu pisassiisarnermi pisasseeqqinnermi tungavigineqassapput. Sumiiffinni pineqartuni aningaasarsiorneq ilungersunartillugu pisasseeqqittarnissaq neqissaqarniarneq eqqarsaatigalugu tungavigineqassapput.
Isorliunerusuni kulturikkut piniariaatsit illersorneqartuaannarnissaat sulissutigineqassaaq.
Tuttut umimmaallu neqaasa sapinngisamik tamakkiisumik atorluarneqarlutik nioqqutissiarineqartalernissaat siunertaralugu imminut akilersinnaassuseq aallaavigalugu pilersitsinissamut aqqutissiuussisoqassaaq piniarnermik inuussutissarsiuteqartut nioqqutissiortullu suleqatigalugit.
Kalaaliminernik tunisassiortarnerup ineriartortittuarnisaa Siumup sulissutigiuassavaa, nunatsinni immitsinnut inuussutissatigut pilersornerunissarput piviusunngortitsiviusumik ingerlanneqarnissaa.
Taamaammat Siumup pingaartippaa kalaaliminernik tunisassiornerup ineriartortittuarnissaa kiisalu tuniniaaveqarnerup piorsarnissaannut pisortaniit aningaasaliissuteqartarnerup ingerlaannarnissaa.
Piniarnermik nakkutilliineq annertusarneqassaaq, nunatsinni nunap immikkoortuini tamakkiinerusumik ingerlanneqartussanngorlugu.
Piniartut piniarfii mianerilluinnarlugit akiliisitsilluni takornarianik piniartsitsisarnerit ingerlanneqassasut Siumup qulakkeeqqajuassavaa.