Kalaallit Nunatsinni nunalerinerup uumasuuteqarnerullu immitsinnut pilersornitsinni pingaaruteqarluinnartutut inissisimalernissaat Siumup sulissutigissavaa.
Nunalerinerup uumasuuteqarnerullu inuussutissarsiutaanerisa annertusarnissaat Siumup sulissutigiuassavaa, aamma ineriartortitsinermut aningaasalersueriaatsit eqqarsaatigalugit. Taamaammat tamatumani ineriartortitsineq pilersaarusiorluakkamik Savaatillit Peqatigiit Suleqatigiissut (SPS) suleqatigalugit ingerlanneqassaaq.
Nunatsinni savaateqarnerup nunalerinerullu ingerlanneqarnerinut Nunatta karsianik isumalluuteqarnerup annikinnerulernissaa suleqatigiinnikkut anguneqarnissaa ingerlanneqassaaq, tamatumani ingerlatsinerup aningaasarsiornikkut allanik tapertaqartariaqarnera avaqqunneqarsinnaanngilaq. Taamaammat nunaateqarfiit amerlanerusut aqqusineqarnikkut ataqatigiinnerulernissaat savaatillit peqatigalugit suliarineqassaaq, takornariaqarnikkut ingerlatsinermi peqataanerunissaq aaqqissuussamik ingerlanneqassaaq aammalu uumasuuteqariaatsit allat aallaavigalugit tapertaralugillu tunisassiornermi ingerlanneqarnissaat tamaviaarunneqassaaq.
Siumup anguniarpaa nunatsinni nunalerinerup uumasuuteqarnerullu imminnut naapertuuttumik ineriartortinneqarnissaat, nunatta neqissaqarnikkut naatitatigullu sapinngisamik annertunerpaamik imminut pilersornerunissaa siunertaralugu, aamma nunanut allanut unammillersinnaasumik nioqqutissiornerup tuniniaanerullu annertusarnissaa eqqarsaatigalugu.
Neqinik nioqqutissianik immitsinnut annertunerpaamik pilersornissarput piviusunngortinneqassaaq. Tamanna angujumallugu neqinik nioqqutissiornermi ineriartortitsivimmik ingerlatsivimmillu pilersitsisoqassaaq.
Atortussanik nerisassanillu immitsinnut pilersornerunissarput annerpaaffissaminiittariaqarpoq. Tamanna nunat allat unammillernerisigut nunattalu iluani assartueriaatsit pitsaanerusut akikinnerusullu atorlugit anguneqassaaq.
Avammut unammillersinnaaneq qulakkeerniarlugu tunisassiornermi aningaasartuutit akitsuutillu minnerpaaffissaminniissapput.
Nunatta naasuinik, paarnaanik, naatitanillu allanik nioqqutissiornerit nutaat aallartisarneqassapput ineriartortinneqarlutillu, tamatumani minguissuseq pitsaassuserlu qitiutilluinnarlugit ingerlatsisoqassaaq, taakkunannga nioqqutissiornernik aallartitsiniartut tamarmik ilinniartinneqartassapput aaqqissuussaasumik akuerisaasumillu. Ilinniartitsinerit ingerlanneqassapput INUILI Narsamiittoq inuussutissalerinermik ilinniarfiusoq allallu atorluarlugit.
Silaannaap allanngoriartornerata periarfissiissutigisinnaasai atorluarniarlugit nunaateqarluni uumasuuteqarlunilu inuussutissarsiuteqarnerup annertusiartortinnissaa siunertaralugu sinerissami nunaminertanik misissueqqissaartoqarnissaa Siumup sulissutiginiarpaa.
Nunalerinermi uumasuuteqarnermilu kinguaariit nikinnerini immaqaluunniit nunalerinermi uumasuuteqarnermilu ingerlatsivioreersup piginnittuusut nikinnerini aallarteqqinnissamut aporfiit suussusersineqarlutillu piiaarneqassapput.Â