Nukissiuutit

Siumup anguniarpaa Nunarput tamarmi 2035-mi mingutsitsinngitsunik nukissiuuteqalersimassasoq. Uuliamik atuineq annikillisarneqassaaq – erngup, seqernup, anorip brintillu nukingi annertunerpaamik atorneqassapput.

Siumut anguniarpaa inuiaqatigiinnut naleqqunnerpaamik, avatangiisinullu mingutsitsinngitsumik nukissiuutinik pilersorneqarneq ingerlanneqassasoq, uuliamillu atuineq annikillisarneqassasoq.

Minguitsumik nukissiuteqarneq inuussutissarsiornikkut ineriartortitsinermut siuarsaassaaq suliffissanillu pilersitsiviulluni. CO2-mik aniatitsineq annikillisarneqassaaq, suliffeqarfiillu nukissiuutinik atuillutik ineriartortitsisut kalaallinit piginneqataaffigineqarnissaat qulakkeerneqassaaq.

Teknikikkut ineriartorneq malillugu nukissiorneq siammarterinerlu ineriartortinneqassapput, illoqarfiit nunaqarfiillu nukissamik isumannaatsumik pilersorneqarsinnaaqqullugit.

Erngup, anorip, seqernup nukinginik kiisalu brintimik atuineq (Power-to-X) ineriartortitsiviussapput. Nunap ilorpiaata kissassusaa iluaqutigalugu nukissiuutinik misileraaneq ingerlanneqassaaq, pingaartumik najugaqarfinni minnerni taamak nukissiorfeqarsinnaanissamut piukkunnaatilinni.

Qasigiannguit, Aasiaat, Kangaatsiaq aamma Maniitsoq mingutsitsinngitsumik nukissiuuteqalernissaat Siumup sulissutigissavaa.

Nunatsinni tasersuit sermersuullu kuunnera, periarfissaqarfiusuni tamani, annertuumik erngup nukissiorfiliorfigineqarnissaat pilersaarusiorneqarlunilu piviusunngortinnissaat sulissutigineqassaaq, nunarsuarmi nukerujussuarmik pisariaqartitsiviusunik nunatsinni suliffissuaqarfiliornissat anguniarlugit. Siumut isumaqarpoq Nunarsuarmi tamarmi CO2-mik aniatitsinerup annikillisarneqarnissaanut nunatta annertunerpaamik mingutsitsinnginnerunissamik sunniuteqarsinnaasoq.  Nunat allamiut suliffissuaqarfiliornissamik siunertaqartut aningaasalersueqataatinnissaat aqqutissiuunneqassaaq, Nunattalu suliniutini tamani piginneqataanissaa inatsisitigut aningaasalersueqataanikkullu qulakkeerneqassaaq.

Siumup anguniarpaa 2035-imi nunatsinni inoqarfinni tamani nunaqqataasut peqatigalugit nukissiuutit mingutsitsinngitsut atorlugit nukimmik pilersulereersimanissarput.

Nunatsinni nukissiornerup imermillu atuinerup ukiuni tulliuttunut 100-nut ingerlaasissaata pilersaarusiornissaa Siumup sulissutigissavaa, inuiaqatigiit siunissami toqqissisimasumik nukissiuuteqarnissaat eqqarsaatigalugu. Avataaniit aningaasalersuisitsinikkut nukissiorfinnik sanaartortarnerit ingerlaannassapput, aningaasalersuinerit tamarmik imminut akileriartuaartussat matumani pineqarmata.

Piffinni kissap illunut siammarlugu tunineqarsinnaanera pillugu suliniutit ingerlanneqassapput, taamaasilluni kiak angerlarsimaffinni pisariaqartinneqartoq mingutsitsinnginnerusumik pissarsiarineqarsinnaassammat.

Angerlarsimaffinni imeq kissartoq atorlugu kiassaateqarsinnaaneq aqqutissiuunneqassaaq, tamatuminngalu suliniarneq peqqissaarunneqassaaq, nalilerneqarniassammat nunatta sinneranut siaruaassinnaanera pillugu ilisimasat pigilerneqarnissaat, tassanngaanniillu suleriarnissat tulliuttut ingerlanneqarnissaat piniassammat.

Sumiiffinni erngup nukissiorfeqareersuni pisortat inissiaataat suliffeqarfiutaallu tamarmik erngup nukinga aallaavigalugu kiassagaanissaat suliarineqassaaq, nukissaq minguitsoq sapinngisamik annertunerpaamik atorluarneqarnissaa qulakkeerlugu, taamaaliornikkut CO2-mik aniatitsineq sumiiffinni pineqartuni malunnaatilimmik apparsarlugu.

Siunissami inissiat sanaartukkat nukissiuutit mingutsitsinngitsut atorlugit pilersorneqartarnissaat anguniarneqassaaq annertusarneqarlunilu, tassani aamma nukissiuutinut atortorissaarutit sanaartornermi aningaasartuutinut ilanngullugit matussuserneqartarnissaat anguniarneqassalluni.

Innaallagiaq nammineq katersorneqartoq tamakkiisumik tunineqarsinnaanissaa akit ingerlaavartumik naleqqussarnerisigut aqqutissiuunneqassaaq.

Aatsitassat minguitsumik nukissiornermi iluaqutigineqarsinnaasut, annertusisamik inuiaqatigiinnut paasititsiniutigineqarnissaat Siumup sulissutigissavaa.