Siumup nukissiornermut politikimini anguniarpaa inuiaqatigiit aningaasaqarnerannut naleqqunnerpaamik avatangiisinullu ajoqusiinngitsumik nukissiuutinik pilersugaanissaq kiisalu uuliamik isumalluuteqarnerup annikillisarnissaa.

Siumup anguniarpaa nukissiuutit minguitsut atorlugit inuussutissarsiornermi suliffissuaqarfinnik annertuunik nunatsinni pilersitsisoqarnissaa – inuussutissarsiornermi sukarsiut ilaattut minguitsunik nukissiorneq inissillugu. Taamatut suliaqarnermi Nunarput nunatsinnilu suliffeqarfiit annertuumik piginneqataanissaat qulakkeerneqassaaq.

Nunatsinnut pingaaruteqarpoq nukissiornermi siammarterinermilu teknikikkut ineriartorneq malinnaaffigissallugu illoqarfiit nunaqarfiillu isumannaatsumik pilersorneqarnerat attatiinnarumallu­gu.

Nunatta aatsitassatigut uuliasiornikkullu periarfissai ineriartortinneqartuassapput, erngup, anorip seqernullu nukingi atorlugit kiisalu brintimik orsussanillu allanik mingutsitsinngitsunik (Power-to-X) nukissiorneq atorlugu.

Erngup, anorip seqernullu nukingi atorlugit kiisalu brintimik Power-to-X-imillu (PtX) nukissiorneq atorlugu nukissiorneq annertusiartortinneqassaaq, nunatsinni inuussutissarsiornermut aningaasaqarniarnermullu oqilisaataasumik, tamannalu aamma CO2-mik aniatitsinerup annikillisarneranik kinguneqassaaq.

Erngup, anorip seqernullu nukingi geotermisk atorlugit kiisalu brintimik nukissiorneq atorlugu nukissiuteeraqarsinnaanerup misilerarneqarnissaa aallartisarneqassaaq, aamma nunaqarfinni illoqarfinnilu mikinerusuni nukissiorneq eqqarsaatigalugu. Illoqarfiit mikinerit Nunaqarfiillu erngup nukissiuuteeraqarnissamut periarfissallit sanaartorfigineqassapput.

Qasigiannguit Aasiaat Kangaatsiallu erngup nukinganik pilersorneqalernissaasa piviusunngortinnissaa Siumup sulissutigissavaa. Siumumit kaammattuutigaarput Maniitsup illoqarfia ilanngullugu nukissiuutinik mingutsitsinngitsunik aallaaveqarluni nukissamik pilersorneqassasoq.

Nunatsinni tasersuit sermersuullu kuunnerata, periarfissaqarfiusuni tamani, annertuumik erngup nukissiorfiliorfigineqarnissaat pilersaarusiorneqarlunilu piviusunngortinnissaat sulissutigineqassaaq, nunarsuarmi nukerujussuarmik pisariaqartitsiviusunik nunatsinni suliffissuaqarfiliornissat anguniarlugu. Siumut isumaqarpoq tamatumaniittoq Nunarsuarmi tamarmi CO2-mik aniatitsinerup annikillisarneqarnissaanut nunatta annertunerpaamik mingutsitsinnginnerunissamik sunniuteqarsinnaanera.  Nunat allamiut suliffissuaqarfiliornissamik siunertaqartut aningaasalersueqataatinnissaat aqqutissiuunneqassaaq, Nunattalu suliniutini tamani piginneqataanissaa inatsisitigut aningaasalersueqataanikkullu qulakkeerneqassaaq.

Siumup anguniarpaa 2035-imi nunatsinni inoqarfinni tamani nunaqqataasut peqatigalugit nukissiuutit mingutsitsinngitsut atorlugit nukimmik pilersulereersimanissarput.

Nunatsinni nukissiornerup imermillu atuinerup ukiuni tulliuttunut 100-nut ingerlaasissaata pilersaarusiornissaa Siumup sulissutigissavaa, inuiaqatigiit siunissami toqqissisimasumik nukissiuuteqarnissaat eqqarsaatigalugu. Avataaniit aningaasalersuisitsinikkut nukissiorfinnik sanaartortarnerit ingerlaannassapput, Aningaasalersuinerit tamarmik imminut akileriartuaartussat matumani pineqarmata.

Piffinni kissap illunut siammarlugu tunineqarsinnaanera pillugu suliniutit ingerlanneqassapput, taamaasilluni kiak angerlarsimaffinni pisariaqartinneqartoq mingutsitsinnginnerusumik pissarsiarineqartassaaq.

Angerlarsimaffinni imeq kissartoq atorlugu kiassaateqarsinnaaneq aqqutissiuunneqassaaq, tamatuminngalu suliniarneq peqqissaarunneqassaaq nalilerneqarniassammat nunatta sinneranut siaruaassinnaanera pillugu ilisimasat pigilerneqassammata, tassanngaanniillu suleriarnissat tulliuttut ingerlanneqassapput.

Sumiiffinni erngup nukissiorfeqareersuni pisortat inissiaataat suliffeqarfiutaallu tamarmik erngup nukinga aallaavigalugu kiassagaanissaat suliarineqassaaq, nukissaq minguitsoq sapinngisamik annertunerpaamik atorluarneqarnissaa qulakkeerlugu, taamaaliornikkut CO2-mik aniatitsineq sumiiffinni pineqartuni malunnaatilimmik apparsarlugu.

Siunissami inissiat sanaartukkat nukissiuutit mingutsitsinngitsut atorlugit innaallagiaqarnissaat anguniarneqassaaq annertusarneqarlunilu, tassani aamma nukissiuutinut atortorissaarutit sanaartornermi aningaasartuutinut ilanngullugit matussuserneqartarnissaannut anguniarneqassalluni.

Innaallagiaq nammineq katersorneqartoq tamakkiisumik tunineqarsinnaanissaa akit ingerlaavartumik naleqqussarnerisigut aqqutissiuunneqassaaq.

Aatsitassat minguitsumik nukissiornermi iluaqutigineqarsinnaasut annertusisamik inuiaqatigiinnut paasititsiniutigineqarnissaat Siumup sulissutigissavaa.