Siumup nukissiornermut politikkimini anguniarpaa inuiaqatigiit aningaasaqarnerannut naleqqunnerpaamik avatangiisinullu ajoqusiinngitsumik nukissiuutinik pilersugaanissaq kiisalu uuliamik isumalluuteqarnerup annikillisarnissaa.
Nunatsinnut pingaaruteqarpoq nukissiornermi siammarterinermilu teknikkikkut ineriartorneq malinnaaffigissallugu illoqarfiit nunaqarfiillu isumannaatsumik pilersorneqarnerat attatiinnarumalluÂgu.
Nunatta aatsitassatigut uuliasiornikkullu periarfissai ineriartortinneqartuassapput, erngup, anorip seqernullu nukingi atorlugit kiisalu brintimik nukissiorneq atorlugu.
Erngup, anorip seqernullu nukingi atorlugit kiisalu brintimik nukissiorneq atorlugu nukissiorneq annertusiartortinneqassaaq, nunatsinni inuussutissarsiornermut aningaasaqarniarnermullu oqilisaataasumik, tamannalu aamma CO2-mik aniatitsinerup annikillisarneranik kinguneqassaaq.
Erngup, anorip seqernullu nukingi geotermisk atorlugit kiisalu brintimik nukissiorneq atorlugu nukissiuteeraqarsinnaanerup misilerarneqarnissaa aallartisarneqassaaq, aamma nunaqarfinni illoqarfinnilu mikinerusuni nukissiorneq eqqarsaatigalugu. Illoqarfiit mikinerit Nunaqarfiillu erngup nukissiuuteeraqarnissamut periarfissallit sanaartorfigineqassapput.
Qasigiannguit Aasiaat Kangaatsiallu erngup nukinganik pilersorneqalernissaasa piviusunngortinnissaa Siumup sulissutigissavaa.
Tasernap tasersiaani il.il. erngup nukissiorfiliorfissarsuup piviusunngortinnissaa sulissutigineqassaaq nunarsuarmi nukerujussuarmik pisariaqartitsiviusunik suliffissuaqarfiliornissat piviusunngortinnissaat anguniarlugu. Nunat allamiut suliffissuaqarfiliornissamik siunertaqartut aningaasalersueqataatinnissaat aqqutissiuunneqassaaq.
Siumup anguniarpaa 2035-imi nunarput tamakkerluni nukissiuutit mingutsitsinngitsut atorlugit nukimmik pilersorsinnaalersimassasoq.
Nunatsinni nukissiornerup imermillu atuinerup ukiuni tulliuttunut 100-nut ingerlaasissaata pilersaarusiornissaa Siumup sulissutigissavaa, inuiaqatigiit siunissami toqqissisimasumik nukissiuuteqarnissaat eqqarsaatigalugu. Avataaniit aningaasalersuisitsinikkut nukissiorfinnik sanaartortarnerit ingerlaannassapput.
Siunissami inissiat sanaartukkat nukissiuutit mingutsitsinngitsut atorlugit innaallagiaqarnissaat anguniarneqassaaq annertusarneqarlunilu, tassani aamma nukissiuutinut atortorissaarutit sanaartornermi aningaasartuutinut ilanngullugit matussuserneqartarnissaannut anguniarneqassalluni.
Innaallagiaq nammineq katersorneqartoq tamakkiisumik tunineqarsinnaanissaa aqqutissiuunneqassaaq.