Inuiaqatigiinni tamat oqartussaaqataanerannik tunngaveqartumi innuttaasut paasissutissanik eqqortunik aallersinnaanerat tunngaviuvoq.
Innuttaasut attaveqartarfinnik atuinerisa (socialmedia) annertusiartornerata ilutigisaanik pitsaaqutit pitsaanngequtillu inuiaqatigiinni eqqumaffigineqarnerusariaqalertussaapput. Paasissutissallu eqqortuunerinik qulakkeerinnissimanani siammarterisarnerup annertusinnaanera pakkersimaarneqassappat, tusagassiorfiit pitsaasumik nukittuumillu inissisimalernissaat pisariaqarneruleraluttuinnarnerannik ersiutaasoq Siumut isumaqarpoq.
Immap naqqatigut attaveqaatitta qajannaannerulernissaa qulakkeerniarlugu, attaveqaatip aapperneqarnissaa sulissutigineqassaaq.
Siumumi isumarput malillugu interneti pingaarutilerujussuuvoq siunissami Nunatta tamarmi naligiimmik ineriartortinnissaanut. Siumup siuttuuffigisaanik nunatsinni innuttaasut tamangajammik 5G-mik attaveqalernissaat anguneqassaaq, ukiullu qulikkaat tulliuttut aallartinneranni piorsaqqillugu 6G-mut ingerlanneqaqqissaaq.
Nunap suatungaaniluunniit najugaqaraluaraanni internetikkut sukkasuumik akikitsumillu attaveqartoqarsinnaasariaqarpoq. Angerlarsimaffiit tamarmik internetimut attaveqaasersorneqarnissaat sulissutigineqassaaq aamma atuisut akilersinnaasaanik akikillisaavigineqarnissaat pisariaqarpoq.
Nunatsinni attaveqaateqarnermut qarasaasianillu atuinermut ilinniarfiit annertusakkat nunanullu allanut unammillersinnaasut pilersinneqassapput.
Paasissutissiisarnikkut teknologi tamanut periarfissiivoq – inunnut ataasiakkaanut suliffeqarfinnullu. Suliffeqarfiit nutaat paasissutissiisarnermut teknologimik tunngaveqarlutik suliaqartut sumiluunniit pilersinneqarsinnaapput – aamma sumiiffinni inukitsunnguugaluani.
Siumup makku ilanngullugit sulissutiginiarpai:
- Nunatsinni attaveqaatitigut atugassarititaasut nunarsuarmi nutaanngorsaarnermut
- malinnaatittuarneqassapput.
- Attaveqaatitigut akigititat appariartortinneqassapput.
- Flatrate inuiaqatigiinnut tamanut atugassiissutigineqassaaq.
- Internetikkut assigiinngitsumik akeqartitsineq nalimmassarneqassaaq (radiokæde, kabelersuit aamma satellit atorlugit).
- Immakkut kabelersuup piginnaasaa tamakkersortinneqassaaq, aningaasaliissutit inuiaqatigiinnut iluaqutaaqqullugit.
- Kabelersuup piginnaasaata avammut tuniniarsinnaanera ammaanneqassaaq.
- Ilinniarfiit tamarmik akeqanngitsumik interneteqalernissaat isumagineqassaaq aningaasaliinerummat ilinniarsimassutsimut.
- Nukissiorfiit Tele Greenlandillu suleqatiginerisigut nunatsinni fiberkabeli eqqukkiartuaarneqassaaq.
- Qarasaasiani datanik toqqorsiviit nillissaanermik atortulersukkat erngup nukiliorfimmit sarfaq minguitsoq atorluarneratigut nunatsinni aningaasarsiutaallutik isertitaqassutaalersinnaapput. Nunap immikkoortuini eqqissisimatitsineq pissutigalugu ineriartornermik uninngatitsineq tassunga atatillugu aamma misissorneqassaaq.
- Nunavummut attavilerneqarsinnaaneq nalilersuutigineqassaaq.
- Imaatigut inuussutissarsiuteqartut umiatsiartortullu Aasiaat Radio attaviginera kipiluttunartarmat pineqartoq ineriartorteqqinneqassaaq. VHF imaatigut angallanniarneq eqqarsaatigalugu isumannaallisaanermut pingaaruteqarpoq.