Nunatsinni pinngortitap mingueqisup illersorneqarnissaa imaannaanngitsuuvoq nunatsinnimi pinngortitaq isorartoqaaq tikikkuminaassinnaasarlunilu. Taamaattumik Siumut tunuarsimaanngilaq mingutsitsinerit suugaluartulluunniit ingalassimaartissallugit siuttuussallunilu, minnerunngitsumik pisuussutitta paarilluarnissaat nammaqatigiittumillu piujuartinnissaat siunertaralugu.
Silaannaap allanngoriartornerata issittumut sunniutai malinnaaffigeqqissaarneqassapput iliuusissallu nunat allat suleqatigalugit suliarineqassallutik. Nunatsinni issittoq silaannaallu pissusai pillugit ilisimatusarfimmik pilersitsisoqassaaq.
Issittumi inuit peqqissuunissamut ulorianartorsiortitaannginnissaat illersorneqassaaq. Siumut suleqataassaaq, suliniaqatigiiffiit attuumassutillit suleqataarusussuseqartullu suleqatigalugit. Nunarsuarmi nunarsuullu immikkoortuini assigiinngitsuni avatangiisitigut ajornartorsiutaasut annertoorsuit issittumi uumassusilinnut sunniuteqapilussinnaasut pakkersimaarniarumallugit.
Naalakkersuinikkut tunngavissaq pitsaanerpaaq tassaavoq, ilisimasaqassuseq paasinnissinnaanerlu, avatangiisitigut pissutsit pitsaasumik sunniuteqartumik ilorraap tungaanut oqimaaqatigiissumillu allanngortinneqassappata. Taamaattumik paasisitsiniaaneq sukumiisumillu sullissineq salliutinneqartariaqarput pisortat, suleqatigiiffiit, pinngortitamik ilisimatuut ilisimatuullu allat suleqatigiinnerisigut.
Nunatsinni avatangiisit illersorniarlugit suliami Namminersorlutik Oqartussat kommunillu inatsisit peqqussutillu aqqutigalugit malittarisassiornermikkut ingerlatsissapput. Najugaqarfiit avataanni pinngortitap atorneqarnera pillugu Namminersorlutik Oqartussat kommunillu akornanni akisussaaffiit pisussaaffiillu agguataarneri nutaamik aaqqissuunneqaqqissapput.
Avatangiisit annertuumik mingutsinneqarsinnaanerat pillugu upalungaarsimaneq annertusarneqassaaq. Upalungaarsimanermi sulisorineqartussat atortussallu pisariaqartinneqartut pigineqarnissaat qulakkeerneqassaaq.
Eqqagassanut politikimi erseqqaarissoq pilersinneqassaaq, ilaatigut angerlarsimaffimmi eqqagassat piffinnut aalajangersimasunut isumannaatsumik suliarineqarlutik assartorneqartassallutik, ilutigitillugu eqqakkat ikuallanneqarsinnaanngitsut soorlu savimerngit il.il avammut niuerutigineqarsinnaanerat aqqutissiuunneqassaaq. Piniagassat nunamiippata imaaniippataluunniit pinngortitamiipput tamarmik. Taamaattumik eqqagarpassuit iliuuseqarfigineqarnissaat piaartumik iluarsiiffigineqartariaqarpoq.
Piffinni unnukkut ingitassani puunik atortulerluni periuseqarnerup qimakkiartuaarneqarnissaa Siumup anguniarpaa, tamanna pilersaarusiorluarnikkut kuuffissuarnut ikaarsaartinneqarnissaa Siumup sulissutigissavaa.
Avatangiisit pillugit aningaasaateqarfik nutaamik aaqqissuussivigineqassaaq. Nunatsinnut eqqagassanngortussatut tikittut suulluunniit pinngortitamiitiinnarneqartannginnissaat siunertaralugu aaqqissuussineq suliarineqassaaq. Avatangiisinut aningaasaateqarfiup annerusumik immerneqarnissaa anguniarneqassaaq.
Avatangiisinut oqartussaanerup tamakkiisumik nunatsinniit oqartussaaffigineqalernissaa sulissutigineqassaaq. Kalaallit Nunaanni Avatangiisinik Misissuisoqarfik Danmarkimi allaffeqartinneqartoq nunatsinnut nuunneqassaaq.
Avatangiisinut pinngortitamullu tunngatillugu Siumup makku ilanngullugit sulissutiginiarpai:
- Avatangiisimik pinngortitamillu innarlitsaaliuineq siunertaralugu innuttaasut akuutinneqarnissaat qulakkeerneqassaaq.
- Pinngortitap avatangiisillu saligaatsuunissaa qulakkeerniarlugu iliuutsit ersarissut ingerlanneqassapput.
- Silaannaap allanngoriartornera pillugu nunatsinni ilisimatusarnerit ingerlanneqartut innuttaasunit akuuffigineqartassapput paasititsissutigineqartassallutillu.
- Nunatta avatangiisittalu saligaatsuutitsinnissaat siunertaralugu meeqqat atuarfiini aallartittumik perorsaasoqartassaaq aammalu qaammarsaasoqartassalluni.
- Aalisarnermi atortut pinngortitami annaaneqarsimasut qimaannarneqarsimasullu eqqarsaatigalugit aalisartut qanimut suleqatigalugit akuttunngitsumik saliisoqartassaaq.
- Inuk imaluunniit suliffeqarfik mingutsitsisimasoq akisussaatinneqartassaaq.
- Piffimmi asimi mingutsitsisoqassanngilaq eqqagassat nammineq pilersitat, akisussaaffigineqassapput najugarisamut nassartassallugit, tassanilu eqqaavimmut inginneqartassallutik.
- Takornariat nunatsinnut tikittartut ukiut tamaasa amerliartuinnarput. Taamaattumik tamakkua annerusumik mingutsitsinnginnissaat pillugu nakkutigineqarnissaat pisariaqarpoq.