Siumup anguniarpaa innuttaasut amerlanerpaat namminneq ineqalernissaat, pisortanit isumalluuteqarnerup appasinnerpaaffianiinnissaa siunertaralugu. Aammalu kikkut tamarmik peqqinnartumik inissaqarnissaat, qanoq akissarsiaqartigineq apeqqutaatinnagu.
Pisortat pigisaanni inissiat pitsaasuussappata ineqarnermut aaqqissuusseqqinnissaq avaqqunneqarsinnaanngilaq. Siumup siuttuuffigissavaa inissiarpassuit sinerissamiittut naalagaaffimmiit tiguneqarsimasut ullutsinnut naleqqukkunnaarsimasut aaqqiiviginissaat, aammalu aningaasalersornissaasa qulakkeernissaat naammassissallugu. Aserfallatsaaliinermut kinguaattoorutit aaqqiivigineqarnissaat pissappat Siumup avataaniit aningaasanik aningaasaliisinnaaneq aammalu attartorsinnaaneq periarfissatut isigaa.
Kalaallit inuiaat imminut pilersortut periarfissaminnik illersuissapput, sanaartugassatigullu nutaaliorneq siuttuuffigissavarput. Imminut pilersornerunissaq siunertaralugu periarfissanik atuilluarnissaq ilinniartitaanikkut eqqunneqassaaq.
Inissiat pitsaasuunissaat ineriartornermullu naleqquttuunissaat Siumup anguniagaasa pingaarnerit ilagaat.
Siumup anguniagaraa ineqariaatsit assigiinngitsut eqqarsaatigalugit aningaasaqarniarnikkut oqimaaqatigiissitsisoqarnissaa, ineqariaatsit qanoq ittuugaluarpataluunniit najugaqarfinni atugarisat toqqissisimanartuussammata.
Pingaaruteqarluinnarpoq ineqarfiliortiternermi aningaasalersueriaatsit nutaat pilersinneqarnissaat. Kalaallit suliffeqarfii illersorlugit suliariumannittussarsiuussineq fagentreprisimik aallaaveqassaaq.
Suliariumannittussarsiuussinermi nunatta pissarititaanik aallaaveqartunik neqeroortut salliutinneqartassapput.
Siumup anguniagaraa nunatsinni amerlanerujartortut nammineq initaartarnissaat illutaartarnissaalluunniit, tamannalu ilaatigut nammineq illussanut piginneqatigiilluniluunniit inissianik sanaartornissanut aningaasaateqarfimmik pilersitsinikkut anguneqarnissaa siunniunneqassaaq.
Piginneqatigiilluni illulioriaatsit piorsarneqartuassapput ineriartortinneqartuarlutillu, kikkut tamarmik tulluarisaminnik inissaliorsinnaaniassammata. Piginneqatigiillutik sanaartorniartut aamma nammineq najugaqarfigissallugu illuliorniartut nunaminertamik qinnuteqarpata, pisussaaffitsillu naammassisimappatigik, nunaminertamik sanaartorfissamik periarfissiissuteqarfigineqartarnissaat kommunit suleqatigalugit qulakkeerneqassaaq.
Illuliortiternermi inissialiortiternermilu utoqqarnut innarluutilinnullu periarfissat pitsaasuutinneqassapput ullutsinnullu tulluartuutinneqassallutik isumannaarneqartassapput, soorlu kommunit suleqatigilluarnerisigut qulakkeerneqarnerisigut.
Nunatta sannaa ima imaannaanngitsigaaq tummerarsuit pinngitsoorneqarsinnaannatik.
Inissialiortiternermi innarluutillit immikkut sanaartornerni periarfissinneqarnissaat pingaaruteqarpoq.
Nunatta pisuussutaanik aallaaveqartumik sanaartugassatigut immitsinnut pilersornerussaagut; ujaqqat, sioqqat, qammasissiat, issoq assigisaallu atorlugit, aamma nunani allani misilittakkat atorluarnerisigut, soorlu Islandimi Norgemilu misilittakkat. Qisuinnarmik sanaartornerujunnaarnerup kingunerissavaa aserfallatsaaliineq annikinnerusoq. Pisuussutivut atorlugit atortussanik pilersuinissaq suliffissanik nassataqassaaq, atortussanillu avataaniit tikisitsisarnerup annikillisaavigineqarnera aningaasartuutitigut sipaarutaasaalluni. Illulioriaatsit nutaat nunatsinni aallaavillit ujartorneqartariaqarput, aamma nukissiutit ataavartut mingutsitsinngitsullu atorlugit sanaartukkat ineriartortittuarnissaat anguniarneqartariaqarpoq.
Issittumi illulioriaatsinut Sisimiuni Arktisk Teknologi allallu suleqatigalugit piorsaaviliortoqartariaqarpoq, ilinniartitaanikkut aningaasalersuinikkullu.
Pisortat illuutaannik inissiaataannillu attartortittakkanik piginnittutut ingerlatsinerup nakkutilliinerullu kommunerujussuarnit ingerlanneqalernissaa misissuiffigineqassaaq piviusunngortinneqassaaq. Kommunerujussuit tamarmik illuliortitsernikkut inissialiortitsernikkut aserfallatsaaliisarnikkullu naligiinnerusumik aningaasaliiffigineqartarlutik ingerlatsiviusarnissaat Siumup sulissutigissavaa.
Meerartallit, inuusuttullu ineqarnermikkut atugarissaarnerat qaffatsinniarlugu, uffarfilinnik, centralvarmelinnik, illunik peqqinnartunik tamatigut najugaqarnissaq anguniarneqassaaq, skibsovninik atuineq atorunnaarsinneqarluni.
Siumut isumaqarpoq pisortat illuutaasa ingerlanneqarnerat aggulunniarneqassanngitsoq, allaffissornerujussuaq pilersinneqassanngippat kiisalu kalaallit piginnaasallit annaannginnissaat pisariaqarmat. Taamaattumik ingerlatseqatigiiffimmik nukittuumik ataatsimoorfeqarnissaq Siumup pilersikkumavaa.
Nunaqarfinni illuliornermut iluarsaassinermullu aningaasaliisarnerit naapertuunnerusumik ingerlanneqartarnissaat anguniarneqassaaq.
Sanaqateqarluni illuliortarneq nunatsinni tamarmut atuuttussanngorlugu aningaasaliiffigeqqittariaqarpoq.
Suliffeqarfiit sulisunut inissialiortarnerini aningaasalersueriaatsit naapertuunnerusut pilersinnissaat Siumup sulissutigissavaa.
Sanaartornermi malittarisassat ullutsinnut naleqqussarsimasut atuutilersinneqassapput. Sanaartornermi nakkutilliinerup pitsanngorsarneqartuassaaq. Sanaartornermi nakkutilliineq sukannernerusoq kinguneqartitsinerusorlu pinngitsoorani eqqunneqassaaq.
Ilinniartut illoqarfinnut nunaqarfinnulluunniit allanut nuullutik suliffimmi sungiusariartartut ineqarfigisartagassaannik pilersitsiortornissaq Siumup sulissutigissavaa.
Sanaartorsinnaanermut aningaasatigut attartorsinnaaneq tamanut ammaanneqassaaq, sumi najugaqarneq apeqqutaatinnagu. Aningaasalersueriaatsit assigiinngitsut ullutsinnut naleqqussaavigiuarnissaat Siumup sulissutigissavai.
Nammineq illuliaasartut ‘Type Illorput 2000’ aamma ‘Type 2100’ pitsaasutut nalilerneqartartut, naleqqussaaviginerisigut ineriartortinneqassapput sinerissamilu sanaartorneqarnissaat timitalersuiffigineqarnerat nanginneqassalluni. Utoqqalinersiutillit illuminnik aserfallatsaaliinermut namminneq periarfissaqanngitsut ikiorsiiffigineqarnissamut periarfissaqartariaqarput.
Ineqarnermut tunngatillugu Siumup makku ilanngullugit sulissutiginiarpai:
- Illoqarfinni nunaqarfinnilu bank imaluunniit realkredit aqqutigalugu attartorsinnaaffiunngitsuni illuliorsinnaanerit periarfissarsiuunneqarnissaasa pitsanngorsarnissaat.
- Ineqarnermut tapiissutit aningaasartuutinut malinnaatittarnissaat, tapiissuteqartarneq ingerlaavartuutillugu qummut killiliussat akit qaffakkiartornerat malillugu naleqqussartarlugit.
- Ineqarnermut tapiissutinut kiassarnermut inermullu aconto ilaatinneqartalernissaat qulaajaaffigineqassaaq, atuutilersinneqarsinnaanissaata sunniutissai takussutissiissutigineqarlutik.
- Illut assigiikkaluarlutik atortumikkut assigiinngissuteqartut, soorlu ilaat skibsovninik kiassartut, uffarfeqanngitsut, imeqanngitsut, eqqakkanut kuuffeqanngitsut il.il. akikinnerusumik najugarineqartariaqarput.
- Inissianut attartortakkanut akiliutaasartut appasinnerpaaffissaaniinnissaat anguniarneqassaaq, taamaattumik najugaqarfinni aningaasartuutit pisariaqannginnerusut suusinnaaneri qulaajarneqassapput nalilersuiffigineqarlutillu.
- Inissaaleqinerup qaangerneqarnissaa anguniarneqassaaq. Inissaaleqineq qaangerneqassaaq tamanit akilerneqarsinnaasunik inissaqartitsinikkut sanaartornikkullu.
- Nunaqarfinni illuliortiternerit aamma inuusuttunut sammisut sulissutigalugit ingerlanneqassapput, inuusuttut allamut nuuttariaqalertarnerat pinngitsoortinniarluguttaaq.
- Inissiat ajoquteqanngikkaluarlutik inoqanngitsut piaartumik inuttalerneqartassapput.
- Pisortat inissiaataani depositum eqaallisarneqartariaqarpoq, pisariaqarpat naafferartumik akiliuteqartarnikkut isertortussanut artukkiinaveersaarnikkut.
- Inissiarsuarni init imermut kiassarnermullu målerilersorneqassapput atugaq kisiat akilersorneqartalissammat.
- Suliffiit inuttassaqanngitsut inuttalerumallugit nunaqqatitsinnut inissamik neqeroorneq eqqunneqassaaq.
- Pisortat inissiaataannik attartortitsinikkut aningaasarsiortarnerit pinngitsoortinniarlugit nakkutilliineq eqqunneqassaaq.
- Inigisamik aserfallatsaaliiniarnermi erniatigut oqilisaasoqassaaq.
- Utoqqarnut tulluartut inigiuminartut pilersinneqassapput.
- BSU-mik illuutit kingornunneqarnissaannut aaqqissuussineq oqilisaanneqassaaq, kinguaanut akiligassat oqimaatsuusinnaanerat millisarniarlugit.
- Sanaartornermi ilinniartut inissaqartinneqarsinnaanerisa (lærlingehjem) eqqunneqarsinnaanera misissorneqassaaq.
- Inissiat atortorissaarutitigut oqummut illersuuteqarsinnaanerat atuutilersinneqassaaq.
- Nunaqarfinni isorliunerusunilu sanaartornermi aningaasalersueriaaseq 95/5 atorlugu illuliortitsisinnaaneq periarfissarsiuunneqassaaq.
- Nunaqarfinni annertuumik inuusuttunik inissaaleqiffiusuni aammattaaq inissialiorsinnaanerit aqqutissiuunneqassapput.
- Utoqqaat pisinnaanerusut inissialiuunneqarnissaat siunertaralugu, kommunit suleqatigalugit avitseqatiginerisigullu (aningaasalersueriaaseq 50/50 atorlugu) sulissutigineqassaaq.
Inissiarsuit pisortaniit pigineqartut aaqqiivigineqarnissaat timitalersuiffigineqassaaq. Taamaammat Siumup makku ilanngullugit sulissutiginiarpai:
- Kommunit Naalakkersuisullu peqatigiillutik pisussaaffigilissagaat sinerissami tamarmi pisortat illuutaasa inissiaataasalu inoqanngitsut piaarnerpaamik piffinni innuttaasunut ineqarfinngortinnissaat siunertaralugu pitsaassutsikkut nalilersorneqarnissaat, akikitsumik ineqarfiulersinnaanissaat siunertaralugu.
- Ineqarnermut akiligassaqarpallaalersartut siunnersorneqarnikkut akilersuinissamut pitsaasumik isumaqatigiissuteqarfigineqartalernissaasa aqqutissiuunneqarnissaa.
- Peqatigiillutik sanaartortitsisut erniat tungaatigut nalimmassarfigineqartuassapput sanaartornermi erniaq appasinnerpaaq atuutsikkumallugu, taamaalillugu inuit ataasiakkaat annertuumik sanaartortartut iluanaarujussuartartullu pakkersimaarniarlugit.