Nunarput isorartoqaaq pissutsillu sumiiffimmiit sumiiffimmut allaanerusarput. Taamaattumik Siumut isumaqarpoq takornariaqarnermi neqeroorutit najukkami pissutsit aallaavigalugit aaqqissuunneqartassasut.
Siumut isumaqarpoq takornariaqarnermi, nunatta nalleruminaatsumik kusanassuseqarnerata saniatigut, aallaaviussasoq nunatsinni kulturi, taannaavormi aamma nunatta naalagaaffinngorniarluni pisareersarneranut tunngaviusoq. Taakkua tunngavigalugit takornarialerinermut inatsit suliarineqassaaq – Takornarialerinermut inatsit nunaqavissunut inooriaatsitsinnullu illersuisoq naammassillugu suliarineqassaaq. Inuussutissarsiornikkut inerisaanerit assigiinngisitaartut pilersissavagut sinaakkutit nunami maani najugaqartunut atoruminartut illersuisullu pingaarnertut qitiutillugit. Nunatsinni inuussutissarsiutinik ineriartortitsinermi aningaasaliisartut takornarialerinermi suliaqartut salliutillugit ukkatarinnissapput, taamaaliussaagut inuussutissarsiornermi sukarsuit ilaattut pitsaasumik ineriartortitsinissaq qularnaarumallugu.
Takornariaqarneq inuussutissarsiutaassaaq aningaasarsiornikkut imminut napatittoq nunattalu aningaasarsiornerani toqqammaviit ilaattut inissisimasoq. Aningaasarsiorfittut suliffissanillu nutaanik pilersitsiffittut piorsarneqarnera ingerlaannassaaq siammasissumillu tunngaveqarluni ineriartortinneqassalluni, avatangiisinut mianerinnittumik ataqqinnittumillu. Kulturitoqqatsinniippoq avatangiisinik mianerinninneq taamaammallu takornarialerinermi nunarsuarmioqatigiit piujuaannartitsinermik annertuumik ukkatarinninnerat annertusigaluttuinnartoq atorluarlugu.
Takornariaqarneq nunatsinni pissutsit tunngavigalugit aaqqissuussaassaaq takornarissallu nunatsinni pilersitanik misigisassaqarnerunissaat anguniarneqassaaq. Taamaaliornikkut siunertaavoq kalaallit amerlanerpaat takornariaqarnermi sulisorineqartarnissaat. Tamannalu qularnaarumallugu takornariartitsinermi akuersissuteqartarnermut inatsit nutarsarneqassaaq, inatsimmik nutarsaaneq kommunit annertunerpaamik akisussaasutut qitiunerat qularnaarneqassaaq, soorlu aamma nunaminertanik atuisinnaanermi nunaqavissut annertunerpaamik piginnittussaanerat qularnaarneqassasoq.
Nunaqarfinni takornariaqarnermik inuutissarsiuteqarluni ingerlatsineq annertusarneqassaaq nukittorsarneqarlunilu, takornarialerinermi periusissiaq nunap immikkoortui tamaasa susassaqartullu tamaasa peqatigalugit suliarineqassaaq, taamaaliornikkut susassaqartut tamarmik piginneqataallutik inuussutissarsiutiminni peqataatinneqarnerat qulakkeerumallugu. Nunaqarfinni unnuisarfeqarnikkut periarfissat annertusarneqassapput, soorluttaaq pikkorissaasarnikkut ingerlatsisarnikkut nunaqarfimmiut amerlanerusut takornarialerinermi peqataanissaannut periarfissinneqarnissaat suliarineqartariaqartoq. Takornariat amerliartorput, taamaammat inoqarfiit mikinerusut ataqatigiissakkamik ineriartortitsivigineqarnissaat pingaaruteqaqisoq ukkataralugu sulinerput nangissavarput.
Takornariaqarnermi suliaqartut suliaminnut qaffassaataasumik ineriartortinneqarlutillu ilinniarfissaqartariaqarput, tamannalu tunngavigalugu takornarialerinermik suliaqartunut siunnersuineq aningaasaliinerlu sineriammi siammarnerusoq sulissutigineqassaaq.
Nunatsinni takornarianik sullissisut, takornariartitsisarnikkut suliffeqarfinnik ingerlatsisut aammalu kikkulluunniit takornariartitsisarnermik aningaasarsiuteqartut Nunatsinni najugaqavissuusarnissaat qulakkeerniarneqartassaaq, tamannalu naammassiumallugu takornarialerinermi inatsit nunaqavissunik nunatsinnilu piginnittuunerup affaaniit annertunerusup nunami maani nunaqavissuunissamik naqissusiisoq suliarineqassaaq. Tamannali ima paasineqassanngilaq avataani aningaasaleerusullutik ineriartortitseqataarusuttut mattunneqarneranik, kinaluunniit takornarialerinermi inerisaarusuttoq tikilluaqqusaavoq, tamannali aatsaat naammassineqarsinnaavoq nunaqavissumik annermik piginneqataatitsinikkut.
Nunat sanilerisavut kukkussutaat kukkussutaaqqeqqunagit, iluatsissimasullu tamanut iluatsitsivioqqullugit ilisimasanik avitseqatigiinneq ingerlanneqassaaq. Tamatumani aningaasarsiornerup nunatsinni annertunerpaamik sunniuteqarluarnissaa anguniarneqassaaq.
Takornarianik sullissisussat nunap avataaniit tikittartut minnerpaamik nunatsinnut tunngasunik ilisimasaqalernissaat anguniarlugit pikkorissarnerit ingerlaneqartariaqarput, takornarialerisummi aasaanerani tikittartut pisariaqartinneqarmata suli.
Takornariaqarneq eqqarsaatigalugu nunat qanitagut suleqatiginerusariaqarpagut. Nunat sanilerisavut kukkussutit kukkussutaaqqeqqunagit, iluatsissimasullu tamanut iluatsitsivioqqullugit ilisimasanik avitseqatigiinneq ingerlanneqassaaq.
Takornarialerinermi pisortat ingerlataat namminersortunut ikorfartuutaallutik ingerlatsinerannut ineriartortitsinerannullu tapertaassapput, ajornanngippat ukiunut arlariinnut isumaqatigiissuteqartarnikkut. Nunap immikkoortui takornarialerinikkut imminnut nappassinnaassuseqalersimasut suliffeqarfiit pisortanit pigineqartut akulerusimaffigineqarnerat pakkersimaarneqassasoq, nunallu immikkoortuini allani inerisaanerit ingerlanneqassasut.