Ilageeqarneq

Inuit timikkut tarnikkullu nukittuut — upperisarsiorneq killilersorneqanngitsoq pisinnaatitaaffiuvoq.

Siumup anguniarpaa kalaaleq timikkut tarnikkullu toqqissisimasoq suleqataasorlu. Ilukkut nukittuujuneq inuunermilu ingerlalluarneq Siumup anersaaraa.

Nunatsinni pisortatigoortumik oqaluffeqarnermi Ilagiit Kalaallit Lutherikkuusut tunngaviupput.

Upperisarsiorneq inunnut ataasiakkaanut misigissutsinullu tunngalluinnartuuvoq, taamaattumik nunatsinni upperisarsiornermi sammiviit assigiinngitsut killilersorneqaratik ingerlanneqarsinnaassapput.

Nunatsinni ilagiit nammineq siulersuissapput, ilagiinni qullersaqarfik sinniisullu peqatigalugit. Nunatsinni Ilagiinni aaqqissugaanikkut naleqqussaanissaq Siumup suleqataaffigerusuppaa, ilagiit qullersaallu peqatigalugit.

Ilagiinni sulisooreersut sulisussallu pikkorissartinneqartarnerat ilinniartinneqartarnerallu aaqqissuulluagaasumik aaliangersimasumillu ingerlanneqartalissaaq. Ajoqinngorniartarneq aaqqissuuteqqinneqassaaq, ukiut tamaasa ajoqinngorniartunik aallartittoqartalernissaa siunertaralugu.

Ilagiinnik sullissiviit, oqaluffiit, palasit illui il.il. ullutsinnut naleqquttumik nutarterneqassapput ingerlaavartumillu aserfallatsaalineqartarnissaat isumannaarneqassalluni.

Siumup pingaartippaa nunaqarfinni isorliunerusunilu ajoqit atorfinitsinneqartussat sumiiffinniit sumiiffimmut nuttarnerminni inissaqarnikkut pitsaanerusumik aaqqissuussiffigineqarnissaat, pisataasa assartorneqarnerat allatuulli pisortat ataani sulisut akiliunneqartartut assigalugit akiliunneqartarnissaat ilanngullugu.

Nunaqarfinni ilagiit pattattuujutigalutik ajoqeqartarnerat periarfissatut ammatinneqassaaq.