Inuiaqatigiit timikkut anersaakkullu peqqissut pilersinneqassapput, ilaatigut timersornikkut periarfissat annertusarneqarnerisigut.
Siumup, Kalaallit Nunaanni Timersoqatigiiffiit Kattuffiata anguniagaa ‘Aalasa’, ukioq 2030 nallertinnagu nunatta nunarsuarmi timimik aalatitsiffiunerpaanngornissaa, tapersersorpaa. Kattuffiullu periusissiaani meeqqat inuusuttullu aalanerulernissaannut siunniussat, kajumissutsimik suliaqarnerup pitsanngorsarneqarnissaa, aalariaatsit amerlanerusut assigiinngisitaarnerusullu kiisalu timersortarfiit aalarusulersitsisut pilersinnissaanni Siumut tamakkiisumik tapersersuilluni aqqutissiuusseqataallunilu suleqataassaaq.
Nunaqarfinni timersornikkut kulturikkullu ineriartortitsinerup nukittorsaavigiuarnissaa ilutigalugu timersortarfeeqqanik / katersuuffigisinnaasanik nunaqarfinnut naleqquttunik sanaartornerup ingerlaqqinnissaa Siumup pingaartippaa. Nunaqarfinni sunngiffimmi sammisassaqartitsivinnik, ukioq tamaat atorneqarsinnaasunik pilersitsisarnissaq Siumup anguniagaraa.
Timersornermut Højskolimik nunatsinni pilersitsisoqarnissaa suliniutaavoq, pilersitsisoqareeraluarpalluunniilli nunani allani timersornerup tungaatigut ilinniarfiit suleqatigalugillu atorluarneqartuarnissaat periarfissaajuaannartariaqarpoq.
Qimusserneq kulturitoqqamik tammatsaaliuineruvoq, taamaattumik Siumup pingaartippaa qimussertartut kattuffiat suleqatigalugu qimussertarnerup tammatsaaliorneqarnerata sulissutigineqartuarnissaa.
Meeqqanik inuusuttunillu sungiusaasut aqutsisullu pitsaanerusunik atugassaqarnissaat Siumup aqqutissiuutissavaa. Meeqqat inuusuttullu sunngiffimminni peqqinnartunik sammisaqarsinnaassapput timersorneruppat, kulturikkut sulineruppat, inuusuttunulluunniit sammisaqartitsineruppat, soorlu nipilersornerit assigisaallu. Sunngiffimmi ilinniartitsinerit nukittorsarneqassapput.
Nunatsinni timersornerup inuussutissarsiutitut ingerlanneqarsinnaalernissaata periarfissarsiuunneqarnissaa suliarineqartariaqarpoq. Nunatta nunanut allanut unammisartuisa timersornikkut pikkorissiartortuarsinnaanissaat ilanngullugu.
Nunatta erfalasua atorlugu OL-mi nunarsuarmioqatillu unammiuaarnerini allani peqataasoqarsinnaalernissaa Siumup anguniarpaa.
E-sport nunatsinni siuariartorpoq. Taamaattumik Siumup E-sport timersuutitut akueralugu tapersersorpaa.