Siumup anguniarpaa kalaaleq timikkut tarnikkullu toqqissisimasoq suleqataasorlu. Ilukkut nukittuujuneq inuunermilu ingerlalluarneq Siumup anersaaraa.
Nunatsinni pisortatigoortumik oqaluffeqarnermi Ilagiit Kalaallit Lutherikkuusut tunngaviupput.
Upperisarsiorneq inunnut ataasiakkaanut misigissutsinullu tunngalluinnartuuvoq, taamaattumik nunatsinni upperisarsiornermi sammiviit assigiinngitsut ingerlanneqarsinnaasariaqarput.
Siumup ataqqivaa ilagiit Lutherikkuusut ilagiit danskit (folkekirken) ingerlanermini tunngavii assigalugit ingerlanerat. Siumut isumaqarpoq nunatsinni ilagiit nammineq siulersuissasut ilagiinni qullersaqarfik sinniisullu peqatigalugit. Nunatsinni Ilagiinni aaqqissugaanikkut naleqqussaanissaq Siumup suleqataaffigerusuppaa, ilagiit qullersaallu peqatigalugit.
Ilagiinni sulisooreersut sulisussallu pikkorissartinneqartarnerat ilinniartinneqartarnerallu aaqqissuulluagaasumik aaliangersimasumillu ingerlanneqartalissaaq. Ajoqinngorniartarneq aaqqissuuteqqinneqassaaq ukiut tamaasa ajoqinngorniartunik aallartittoqartalernissaa siunertaralugu.
Ilagiinnik sullissiviit, oqaluffiit, palasit illui il.il. ullutsinnut naleqquttumik nutarterneqassapput ingerlaavartumillu aserfallatsaalineqartarnissaat isumannaarneqassalluni. Palasit illuisa ingerlanneqarnerannut akisussaaffik A/S Inissiaatileqatigiiffik Inip tigussavaa.
Taamatuttaaq Siumup pingaartippaa nunaqarfinni isorliunerusunilu ajoqit atorfinitsinneqartussat sumiiffinniit sumiiffimmut nuttarnerminni inissaqarnikkut pitsaanerusumik aaqqissuussiffigineqarnissaat, pisataasa assartorneqarnerat allatuulli pisortat ataani sulisut akiliunneqartartut assigalugit akiliunneqartarnissaat ilanngullugu.
Nunaqarfinni / Isorliunerusuni ilagiit pattattuujutigalutik ajoqeqartarnerat periarfissatut ammatinneqassaaq.