Angallanneq assartuinerlu

Siumup anguniarpaa angallannermi inuit tamarmik periarfissaqarnissaat. Angallannermi akit appasinnerusariaqarput, innuttaasut pisariaqartitaat salliullugit – kikkut tamarmik pisariitsumik angalasinnaaqqullugit.

Siumup anguniarpaa Nunatsinni angallanneq isumannaatsuussasoq, tamanut periarfissaqartoq aamma attaveqaatilersorsimaneq inuiaqatigiit tamarmiusut pillugit ineriartortinneqartuartoq.

Angallannerup aaqqissuussaanera nunap inuisa pisariaqartitaannut naapertuuttumik eqaatsumik ineriartortinneqassaaq. Sumiiffinni angallanneq – nunakkut, imaatigut silaannakkullu – ataqatigiissaarneqarsimasumik pilersaarusiorneqarsimassaaq.

Silaannakkut angallassineq aammattaaq timmisartunut mikinerusunut naleqqussarneqassaaq, mittarfiillu piusut pilersinneqartussallu ineriartortinneqassapput. Takornarianut sanilliullugit nunaqavissut salliullugit sullinneqassapput.

Kiffartuussinissamut isumaqatigiissutit innuttaasunut atoruminartuussapput pitsaasumillu aaqqissuunneqarsimassallutik, aamma isumaqatigiissutit kommunit suleqatigalugit ineriartortinneqartuassapput.

Assartuinerup iluani kisermaassisussaatitaaneq atorunnaarsinneqassaaq, kiffartuussinerlu sumiiffiit pisariaqartitaat aallaavigalugit ingerlanneqassaaq.

Nunatsinni silaannakkut nakkutilliisoqarfik nunatsinni aallaaveqarluni kiffartuussissaaq, silasiorfiit pisariaqartinneqartut ilanngullugit.

Uku tunngavigalugittaaq Siumut sulissaaq:

• Angallannermi akit tamanit nammanneqarsinnaassapput.
• Utoqqaat timersortartullu angallannikkut akikillisaaffigineqassapput, kulturilerisut peqatigiiffilerisartut il. il. ilanngullugit.
• Mittarfik atorluarneqaqqullugu Narsap Qaqortullu akornanni aqquserniortoqassaaq (Nuupiluk).
• Tasiilami mittarfiliortoqassaaq. Uummannami, Qeqertarsuarmi, Qasigiannguani, Kangaatsiami, Narsami, Nanortalimmi Ittoqqortoormiinilu suluusalinnut mikinerusunik mittarfiliortoqarnissaanut piareersarnerit sulinerullu ingerlanneqartuassapput.
• Silaannakkut angallannermi piffissaq kingullerpaaq atorlugu bilitit tuninngitsuukkat akikinnerusunngorlugit neqeroorutigineqartalernissaat anguniarneqassaaq.
• Meeqqanut inuusuttuaqqanullu angalaniarnermut akit appasinnerusut 12-inik ukiulinniit eqqunneqarnissaat sulissutigineqassaaq.
• Angalanermi kinguaatoortoqartillugu inigisatigut pitsaanerusumik ullutsinnullu naleqquttunik aaqqissuussinissat pisariaqarmata tamanna sulissutigineqassaaq.
• Mittarfeqarfiit heliportillu nunami atortorissaarutaat pisoqalisimasut taarserneqarnissaat pisariaqarpoq, silaannakkut angalaneq patajaannerusoq pilersikkumallugu.
• Isorliunerusuni kaperlattartunilu heliportini qullilersuisoqassaaq, sumiiffinnilu aalajangersimasuni pisariillisaanissaq siunertaralugu qulimiguullit angerlarsimaffeqalersinnaanerat misissorneqassaaq.