Angallannerup aaqqissuussaanerata pitsaasuullunilu isumannaatsuunissaa Siumup sulissutigiuarpaa.
Nunatta sananeqaataanut tulluartumik eqaatsumillu angallanneq assartuinerlu aaqqissuunneqassaaq.
Nunatta iluani ilaasunik angallassinerup annertunerpaamik silaannakkut imaatigullu ineriartortinneqarnera ingerlaannassaaq, ilaatigut sinerissami suluusalinnut mittarfiliortiternerit aammalu talittarfigissaanerit ingerlatiinnarneqarnerisigut.
Imaatigut silaannakkullu angallannerup ataqatigiittumik aaqqissuunneqarnissaa avaqqunneqarsinnaanngilaq. Pisariaqartitsineq naapertorlugu umiarsuakkut ilaasunik angallassineq ingerlaannassaaq.
Innuttaasut inoqarfiillu pisariaqartitaat naapertorlugit angallanneq assartuinerlu aaqqissuunneqassapput. Sumiiffiit tamarmik angallannikkut periarfissaqarnissaat qulakkeerneqassaaq.
Inoqarfiit sapinngisamik amerlanerpaat timmisartunut qulimiguulinnulluunniit mittarfeqalernissaat anguniarneqassaaq. Silaannakkut angallassinermi ajornanngikkaangat timmisartut mikinerusut atorlugit angallanneq aaqqissuunneqartassaaq. Silaannakkut angallassinerup tungaatigut niuernikkut akilersinnaassuseqarneq naapertorlugu, mittarfiliassat tullinnguuttut pioreersullu piumasaqaataalersussanut naleqqussarneqartuassapput.
Angallannikkut assartuussinikkullu ingerlatseqatigiiffiit pisortat pigisaat eqaannerusumik imminnut suleqatigiissapput.
Nunatta kimmut silaannakkut aalajangersimasumik attaveqalernissaa Siumut piviusunngortissavaa.
Kiffartuussinissamik isumaqatigiissuteqarnermi pitsaassutsip minnerpaaffissaa qulakkeerneqartassaaq, apeqqutaatinnagu silaannakkut imaatigullu angallassinerunersoq. Kiffartuussinermik isumaqatigiissusiornermi inoqarfiit inukinnerusut angallannikkut assartuinikkullu pitsaasumik aaqqiiviginissaat qulakkeerneqartassaaq, pingaartumik inuussutissanik pilersorneqarnerat tamanut toqqissisimanartumik aaqqiivigineqarsimasassalluni. Kommunit aaqqissuussinermi qanimut oqartussaaqataassapput.
Kiffartuussinissamik isumaqatigiissutillit nunaqavissut siulliullugit sullittassavai, takornariat siulliunnagit immakkut nunakkut silaannakkullu angalanerni.
Nunatsinni nunanullu allanut angallassineq assartuinerlu eqaatsoq nunatsinni aningaasatigut atugarissaarnerunermut aqqutissaavoq. Nunatta nunanik allanik niueqateqarnera annertusarniarlugu nunanik allanik imaatigut angallannikkut assartuinikkullu suleqateqarnissaa anguniarneqassaaq.
Assartuinikkut ingerlatseqatigiiffiit kisermaassisussaatitaanerat atorunnaarsinneqassaaq, kiffartuunneqartullu pisariaqartitaat aallaavigalugit sullissineq ingerlanneqassalluni. Imartakkut assartuinermi umiarsualivinnut aalajangersimasunut pituttuisoqassanngilaq.
Silaannakkut angallannermi nakkutilliisoqarfiup nunatsinnit akisussaaffigineqalernissaa Siumup anguniarpaa. Oqartussaaffiup akisussaaffigilerneratigut qulakkeerneqassaaq timmisartut qulaavaasut nunatsinnut isaatitsissutaalernissaat, suliffiit nunatsinniinnissaat taamaasiornikkut akileraarutitigut isertitassat nunatsinnut iluaqutaalernissaat aammalu innuttaasut najugaqavissut akisussaaffimik tigusinissaat pisarialimmillu ilinniartinneqarnissaat qulakkeerneqassalluni.
Silasiornikkut upalungaarsimanermut nakkutilliinerup nunatsinniit akisussaaffigineqalernissaa Siumup anguniarpaa.
Siumut periarfissaatillugu pingaartippaa inoqarfiit akornanni ilaatigut inuussutissarsiornermi inerisaanissaq siunertaralugu aqqusinniorsinnaanerup aqqutissiuunnissaa.
Angallanneq assartuinerlu pillugu inassuteqaatit:
- Angallannermi akit tamanit nammanneqarsinnaassapput.
- Utoqqaat timersortartullu angallannikkut akikillisaaffigineqassapput, kulturilerisut peqatigiiffilerisartut allallu kajumissutsi atorlugit suliaqartut ilanngullugit.
- Qaqortup Narsallu akornanni mittarfik sanaartorneqarpoq, Narsallu tungaanut aqquserniortoqassaaq.
- Tasiilami mittarfiliortoqassaaq.
- Uummannami, Qeqertarsuarmi, Qasigiannguani, Kangaatsiami, Narsami, Nanortalimmi Ittoqqortoormiinilu suluusalinnut mikinerusunik mittarfiliortoqarnissaanut periarfissat sulissutigineqassapput inuussutissarsiornikkut siuarsaanermut aningaasaliissutit aammalu suliffissaqartitsiniarnermut aningaasaliissutit kiisalu allat suleqatigineqarsinnaasut suleqatigalugit mittarfiit pilersinniarneqassapput.
- Kangerlussuup Narsarsuullu siunissaat pillugit kommunit peqatigalugit aalajangiisoqassaaq, tassungalu atatillugu namminersorlutik inuussutissarsiuteqartut suliassanik tigusisinnaanerat ammaffigineqassalluni.
- Sisimiuniit Kangerlussuarmut aqqusineq aningaasaleeqataaffigineqarlunilu naammassillugu suliarineqassaaq.
- Nioqqutissanik assartuinerup assigiimmik akeqalernissaa sulissutigineqassaaq
- Ukioq naallugu utoqqalinersiallit siusinaarlutik pisartagaqalernikut akikitsumik angalasinnaanermut periarfissaqassapput.
- Kangerlussuup cargocenteritut atorneqarsinnaanera sulissutigineqassaaq.
- Silaannakkut angallannermi piffissaq kingullerpaaq atorlugu bilitsit tuninngitsuukkat akikinnerusunngorlugit neqeroorutigineqartalernissaat kaammattuutiginarpoq.
- Kiffartuussinermut isumaqatigiissut Qeqertarsuup tunuani aamma Kangiani ataqatigiinnerusoq pilersinneqartariaqarpoq, assersuutigalugu inuiaqatigiit akilersugaanik sullissisut akunnerminni suleqatigiinnerunissaat eqqumaffigalugu.
- Meeqqanut inuusuttuaqqanullu angalaniarnermut akit appasinnerusut 12-inik ukiulinniit eqqunneqarnissaa sulissutigineqassaaq.
- Mittarfeqarfiit kinguaatoortoqartillugu inigisatigut pitsaanerusumik ullutsinnullu naleqquttunik aaqqissuussinissaat pisariaqarpoq.
- Mittarfeqarfiit heliportillu nunami atortorissaarutaat pisoqalisimasut taarserneqarnissaat pisariaqarpoq, silaannakkut angalaneq patajaannerusoq pilersikkumallugu. Ataatsimut isigalugu angallassineq pitsaanerusoq ataavarnerusorlu aamma sulissutigineqassaaq.
- Isorliunerusuni kaperlattartunilu heliportini qullilersuisoqassaaq, sumiiffinnilu aalajangersimasuni qulimiguullit angerlarsimaffeqalersinnaanerat pisariillisaanissaq siunertaralugu misissorneqassaaq.