Nunatsinni ajunaarnersuarnut upalungaarsimajuarnissarput pisariaqarluinnarpoq, upalungaarsimanermut ataatsimiititaliarsuup ingerlalluarnissaa pisariaqarpoq aammalu suleqatigiinnermi tassani inuiaqatigiinni pisariaqartut tamarmik peqataatinneqassapput.
Timmisartut umiarsuit ajunaarnerini, nunamik ikuallattoornermi, illorsuit ikuallarujussuarnerini, tassaarsuartoqarnermi allatigullu ajunaarnersuarnut periusissat peqqissaartumik suliarineqarsimasassapput. Inuttaasullu peqataatinnissaannut periusissiat innuttaasunut ingerlaavartumik paasissutissiissutigineqartassapput.
Nunat uatsinnut sanilliuttakkavut assigalugit pisoqarfiusuni, soorlu tassaarsuartoqarfiusuni, inuit sumiiffimmi najugallit salliullutik upalungaarsimasussatut aaqqissuussamik piareersiumasuutigineqartassapput. Aaqqissuussineq Islandimut Canadamullu assingusoq nunatsinnut eqqunneqassaaq.
Nunatsinni upalungaarsimanikkut periusissiap naleqqussarlugu nutartertuarnissaa Siumup sulissutigiuassavaa. Nunatsinni inuutaasut tamarmik sumiluunniit najugaqarunik toqqissisimallutik inuunerminnik ingerlatsinissaat qularnaarneqarsimajuartariaqarpoq.
Nunatsinni upalungaarsimanermut aqutsisoqarfik nutaamik aaqqissuuteqqinneqassaaq susassaqarfiit tamaasa peqataatillugit.
Upalungaarsimanermi akisussaaffilersuinerit pisussaaffilersuinerillu tamarmik ajunngitsumik paasiuminartumillu aalajangersarneqartassapput.
Upalungaarsimanermi suliaqartut toqqissisimanartumik, akissaatitigullu naleqquttumik suliffeqartutut inissisimasoqalernissaa anguniarneqassaaq.
Nunami imaanilu mingutsitsinermi sillimaniarnermut pikkorissartuarnissaat, atortorissaarutitigullu malinnaajuarnissaat.
Takornariaqarnerup annertusiartornera malillugu umiarsuit takornariartaatit upalungaarsimanikut annaassiniarsinnaanikkullu pitsaasumik sullinneqartuarnissaat ineriartortinneqassaaq.
Innuttaasut qaammarsaaffigineqartuarnissaat imaani nunamilu ajutoornaveersaartitsinermut tunngatillugu ingerlaavartunngortinneqassaaq.
Qatserisartoqarneq
Nunarput tamakkerlugu innuttaasut tamarmik Nunaqarfimminni Illoqarfimminnilu toqqissisimallutik ulluinnarni inuunerminnik ingerlatsinissaat qulakkeersimaniarlugu Nunatsinni qatserisartoqarnerup inatsisitigut ersarissumik tunngaveqartumik aammalu qatserisartutut inissisimanerup apersuuserneqarsinnaajunnaarlugu aaqqiiviginissaa Siumup sulissutigeqqinniarpaa, taamaattumik;
Nunatsinni qatserisartunut ilinniarfik aammalu annaassiniartarnermut ilinniarfik ataatsimoortillugit ingerlanneqarsinnaasunngorlugit Kangerlussuarmi pilersinneqassapput. Taamatullu aamma upalungaarsimanermi suliassaqarfiit isumagisassallu ilanngullugit ilinniartitsissutigineqartassapput.
Sinerissami qatserutitigut atortorissaarutit ullutsinnut naleqquttut Nunaqarfinni Illoqarfinnilu tamani pigineqarnissaat.
Meeqqat atuarfiini ilinniarfinnilu, aammalu piffinni pisariaqartitsiffiusuni ikiueqqaarnermut paasisitsiniaasoqarlunilu ilinniartitsisoqartassaaq,tassami sumiluunniit pisoqarsinnaanera eqqarsaatigalugu sapinngisamik innuttaasut amerlanerpaat ikiueqqaarnermut minnerpaamik ilisimasaqartariaqarput.
Suliffeqarfinni pisortani pigineqartuni tamani, uummammut aallartitsissut pigineqassasoq Siumut isumaqarpoq.
Qatserisartut atugaat pitsanngorsaavigineqassapput, akissarsiaat ilanngullugit.