Siumup Tasiilap aamma najugaqarfiit allat, ukiukkut umiarsuarnik tikinneqarsinnaanerat
killeqartartoq imaluunniit matoqqasartoq, qanoq ukiuunerani pilersorneqarnissaat
qulakkeerniarneqarnersoq pillugu erseqqissumik akissuteqartoqarnissaa piumasaraa.
Tasiilami pissutsit maanna immikkut eqqumaffigineqartariaqarput. Paasissutissat naapertorlugit
niuerfigisartakkamik allanngortitsineq pissutigalugu ukiuunerani pisariaqartinneqartunik
nioqqutissanik arlalinnik inniminniinermi allattorsimaffimmit peerneqarsimapput. Peqatigisaanik
ukioq manna nalinginnaasumik umiarsuup kingullertut tikinnissaanut umiarsuit marluinnaat
Tasiilamut tikittussaapput.
Tamanna annertuumik ernumanissamut pissutissaliivoq.
Tasiilaq kisimi Kalaallit Nunaanni ukiuunera sikulu pissutigalugit imaatigut assartuinissamut
periarfissat sivisuumik atorunnaartarlutik imaluunniit annertuumik killeqalerneq ajorpoq,
Kalaallimmi Nunaata avannaani kangianilu najugaqarfiit arlallit ukiuunerani pilersuinissamut
pisariaqartitat imaatigut aqqut suli ammatillugu piffissaagallartillugu pilersaarusiorneqarnissaat,
inniminnerneqarnissaat umiarsuarnillu assartorneqarnissaat pinngitsoorsinnaanngilaat.
Umiarsuaq kingulleq aallareerpat inniminniinermi allattorsimaffimmi kukkuneq
aaqqinniarlugu iliuuseqarnissaq kingusinaareersimassaaq.
Taamaattumik niuerfigisartakkamik allanngortitsineq ukiuunerani amigaateqartumik pilersuinermut
utoqqatsissutissatut atorneqanngisaannartariaqarpoq. KNI-p Pilersuisullu sumiiffinni
pilersukkaminni nunap pissusaa silallu atugassarititaat ilisimavaat. Taamaattumik
pilersaarusiornermi ukiuunerani ukiut tamaasa kingusinnerusukkut ilassutitut pilersuinissamut
periarfissat killeqalersarnerat eqqarsaatigineqartariaqarpoq.
KNI inuiaqatigiinni immikkut ittumik pilersuinissamik pisussaaffeqarpoq. Taamaattumik
najugaqarfiit ukiukkut imaatigut tikinneqarsinnaajunnaartartut pilersorneqarnissaat
qulakkeerneqassappat, piffissaagallartillugu pilersaarusiornissaq naammattumillu
sillimmateqarnissaq piumasaqaataasariaqarput.
Siumut taamaattumik akissuteqarfigineqarusuppoq, ukiuunerani pilersuinissamut nioqqutissat suut
inniminniinermi allattorsimaffimmit peerneqarsimanersut, sooq taama pisoqarsimanersoq, KNI-p
niuerfimmik allanngortitsinerup kingunerisinnaasai qaqugukkut ilisimasaqarfigilersimanerai, kiisalu
ajornartorsiutit assingusut sumiiffinni allani aamma atuunnersut.
Tamatuma saniatigut KNI-p najugaqarfinni siku ukiuuneranilu pissutsit pissutigalugit qaammatini
arlalinni nalinginnaasumik umiarsuakkut pilersuineq unitsinneqartartuni naammattunik
nioqqutissanik toqqorsiveqarnissaq qanoq qulakkeerneqarnissaa pillugu nassuiaatigissagaa
kissaatigaarput.
Pilersuinissamik pisussaaffik ilisiviit imaarunneranni aatsaat oqallisigineqartariaqanngilaq.
Umiarsuaq kingulleq aallannginnerani malugineqarsinnaasariaqarpoq.
Ukiuunerani pisariaqartut nioqqutissat amigaataappata, niuerfigisamik allanngortitsineq imaluunniit
pilersaarusiornermi kukkuneq pissutaasoq nassuiaatigissallugu kingusinaareersimassaaq.
Tasiilamut umiarsuit marluinnaat suli tikittussaapput.
Taamaattumik maanna iliuuseqartoqartariaqarpoq.
Siumut piumasaqarpoq KNI Pilersuisoq Naalakkersuisullu piaarnerpaamik Tasiilap ukiuunerani
pilersorneqarnissaa pillugu nassuiaateqassasut, peqatigisaanillu najugaqarfinni allani ukiuunerani
siku pissutigalugu imaatigut assartuineq killeqartartuni imaluunniit matoqqasarfiini pilersuinerup
qanoq qulakkeerneqarsimanera uppernarsassagaat.