Tusagassiutinut Nalunaarut
Sermitsiaq.AG-mi Kommune Kujallermi Borgmesterip Malene Vahl Rasmussenip nalunaarutigaa imigassamik tuniniaanerup sassaalliinerullu matoqqatinneqarnerat qaammammit ataatsimit sivikinnerunnginnissaa. Taamak aalajangiineq Kommune Kujallermi Siumup gruppiata peqataaffiginngilaa.
Ullaaq manna 22. oktober nittartakkami Sermitsiaq.AG-mi Kommune Kujallermi Borgmesteri Malene Vahl Rasmusseni issuarneqarpoq imigassamik aalakoornartortalinnik tuniniaanerup aammalu sassaalliinerup qanittumi ammaateqqinneqarnissaanik naatsorsuuteqartoqassanngitsoq. Aammalu naatsorsuutigineqartariaqartoq matoqqatitsinerup qaammammit ataatsimit sivikinnerunnginnissaanik issuarneqarluni.
Tamanna Siumup Kommune Kujallermi kommunalbestyrelsimut ilaasortaatitaasa aalajangeeqataaffiginngilaat, taamalu aalajangiinerup sivikinnerpaaffilerneqarnera pillugu ilisimatinneqarnatik. Taamaatumik Siumup Kujallermi kommunalbestyrelsimi ilaasortaatitaasa matumuuna borgmesterip nassuiaateqarnissaanik piumasaqarfigaat.
Borgmesterip ilisimatitseqqaarnani namminerisaminik aalajangersaanera Siumup akuersaangilaa, taamaattumillu aalajangiussani pingaarutilinni angisuunilu pinngitsoorani tunuliaquttani peqatigisassagai Siumumit piumasaraarput.
Taamatuttaaq Kommune Kujallermi Kommunalbestyrelsi immikkut ittumik ataatsimiitsinneqarnissaa piumasaraarput, tamannalu Borgmesterip piaarnerpaamik timitalissagaa naatsorsuutigalutigu.