Nunarput ingerlanneqassaaq Kalaallisut oqaatsivut pisortatigoortumik oqaasiusut atorlugit.
Taamaattumik oqaatsit pillugit inatsit oqaatitsinnik illersuisoq pilersinneqartariaqarpoq.
Nunarput namminersorluni kulturikkut pitsaasunik atugassaqartitaasoq Siumup anguniagaraa, tamannalu ilaatigut “Kulturip ulluanik” pilersitsinikkut annertusarneqassaaq.
Inuiaqatigiit atugarissaartut ilisarnaatigilluinnartarpaat kulturikkut sunngiffimmilu uummaarissumik peqataalluartut. Inuiaqatigiit tamatta suliassaraarput nunaqqatitta kulturikkut sunngiffimmilu peqataanissaannut pitsaanerusunik tunngavissiornissaq kiisalu nunaqqatigiittut qaammarsaqatigiinnissaq.
Piorsarsimassutsikkut ineriartortitsineq tassaassaaq inuiaqatigiinnit aallavilik, inuiaqatigiit kissaataat aallavigalugit. Siumumi isumaqarpugut piorsarsimassutsimut pisortaniit aningaasaliissutaasartut Naalakkersuinikkut siunertarineqartunut naapertuuttuusassasut.
Nunatsinni kalaallisut oqaatsitta siunissami ajunngitsumik atugaanissaat Kalaallisullu atuakkiortarnerup ineriartortittuarnissaa siunertaralugu Kalaallit Nunatsinni atuakkiortunngorniarfimmik pilersitsisoqarnissaa Siumup sulissutigissavaa. Nunatsinni naqiteriveqaqqilernissaa Siumup anguniassavaa. Siumup sulissutigissavaa kalaallit atuakkiortuisa atuakkiai erianartut ullumikkullu naqiterneqarunnaarsimanertik aallaavigalugu pissarsiariuminaallisimasut naqitertinneqaqqinnissaat. Naqiterinernut ilanngullugit atuakkiat E-Book-inngorlugit immaqaluunniit atuakkat atuffassissutitut pissarsiarineqarsinnaanngornissaat sulissutigineqartariaqarpoq.
Siumup anguniarpaa nunatsinni suliffeqarfiit pisortat ingerlataat tamarmik oqaatsit pisortatigoortut – Oqaatsivut – atorlugit ingerlatsiviussasut. Siumup anguniarpaa pisortatigoortumik oqaatsit tamakkiisumik atuutsinneqalissasut kingusinnerpaamik ukioq 2025 nallertinnagu, pisortat suliffeqarfiini sulisut oqaatsitsinnik atuinngitsut pisortatigoortumik oqaatsitsinnik ilinniarsinnaanissaminnut pinngitsooratik periarfissinneqassapput.
Tusagassiuinermut tunngatillugu siammasissumik aallakaatitassiortarnerup nukittorsarnissaa pingaaruteqarpoq. Tusagassiornermi pitsaassuseq qaffasinnerpaaq anguniarlugu TV-qarfinni radioqarfinnilu tamani tusagassiuisut teknikerillu ilinniarsimasut atorneqarnissaat anguniarneqassaaq. Tusagassiutit nukittuut pilersinneqassapput tamat oqartussaaqataaneranut pingaaruteqarmat. Tusagassiutinik kiffartuussinissamik isumaqatigiissut ullutsinnut naapertuuttunngortillugu nutarteqqinneqassaaq. Aaqqissussaanermi oqartussaasut tassaassapput inuiaqatigiinni ilisimasaqarnertik, naleqartitatsinnik oqaatsitsinillu piginnasaqarnertik ilisimasaqarnertillu toqqammavigalugu atorfinitsinneqarsimasut.
Aaqqissugaanikkut oqaatsitta piujuaannartinneqarnissaat sulissutigineqassaaq.
Nunap aqqinik tammatsaaliuinissaq inuiattut ileqqunik oqaluttuarisaanerannillu tammatsaaliueqataavoq. Taamaattumik nunap aqqinik nalunaarsuineq qaammarsaanerlu sukumiisumik suliarineqartariaqarput.
Piorsarsimassutsikkut inuusaatsikkullu kalaallit oqaluttuarisaaneranni eriagisassat pingaaruteqartut najukkani ataasiakkaani katersugaasivinni, Nunatta Katersugaasiviani Allagaateqarfianilu, atuagaateqarfiillu allat aqqutigalugit tammatsaalineqassapput. Nunatsinni eriagisassanik misissuisinnaaneq periarfissagissaarnerussaaq. Nunatsinni eriagisassat ajornannginnerusumik periarfissaqarluni ilinniartunit atuartunillu misissorneqarsinnaalissapput. Toqqortat eriagisassat innuttaasunit takuneqarsinnaanissaat aammalu takornarissanit alutornartutut alakkarneqarsinnaanissaat periarfissaasariaqarpoq. Taamaattumik katersugaasivigillisaanerit aammalu annertusaanerit aallunneqartariaqarput.
Eqqumiitsuliortut, sanaluttartut, atuakkiortut nipilersortartullu suliaminnut atatillugu pikkorissartinneqartassapput, suliaminnillu ingerlatsiffissaannik ineriartortitsisoqassalluni. Namminersorlutik Oqartussat Katuamut tapeeqataasarnerat aqqutigalugu annertunerusumik periarfissiisoqassaaq sinerissamut Katuap aaqqissugaanik siammaterisarnissaq. Nunani avannarlermiut naggueqativullu annertunerusumik kulturikkut suleqatiginerussavagut.
Nuummi kalaallisut oqaatsitta nukittorsarnissaat avaqqunneqarsinnaajunnaarpoq. Taamaattumik immikkut iliuuseqarluni oqaatsitta tammatsaaliornissaat suliarineqartariaqarpoq.
Eqqumiitsuliorneq, isiginnaartitsineq, nipilersorneq, erinarsorneq timersornerlu meeqqerivinni, meeqqat atuarfiini ilinniarfinnilu allani pingaartillugit ilinniartitsisutigineqartassapput.
Filmiliornerup nunatsinni ineriartornera annertusaavigineqartariaqarpoq, tamanna ilaatigut filminstitutsiliornikkut anguniarneqassaaq.
Atuakkiortut atuakkiaannik naqiterisarneq annertunerusumik nunatsinni naqiterneqartarnissaa Siumup sulissutigissavaa. Inuiattut ileqqutoqqagut tammatsaaliniarlugit piniakkanik killilersukkanik agguaassisarnermi immikkut inuiattut piniariaasitoqaq atorlugu piniartunut pisassiisarnissaq eqqunneqartariaqarpoq.