Kommuneqarfik Sermersuup aningaasanik 1.25 milliardinik attartorniarnera Naalakkersuisut decembarip 15-iani 2022 ataatsimiikkamik akuersissutigaat. Tamannalu aatsaat pivoq Siumup kommunimi tunuliaqutaasa aamma siulersuisuunerisa tamakkiisumik piumasaqaatai qulakkeerneqarmata, Siumullu piumasaqaatit avaqqunneqarsinnaanngitsutut isigalugit Naalakkersuisuni sulimmat
All.: Erik Jensen, Siumup siulittaasua
Kommuneqarfik Sermersuumi killiffik ingerlatsisimanerlu tulluusimaarutissaanngiivippoq.
Siumup ulluinnarni sulinera immikkoortortaqarfiit qinikkallu akuutinnerisigut tunngavilersuinerisigullu tunuliaqutersorneqarpoq.
Kommuneqarfik Sermersuup ukiorpassuarni ingerlanerlussimaneranut tunngatillugu aningaasarpassuarnik atorniartariaqalernera assinganik inissisimavoq, suliarlu Siumup siulersuisuunerisa aalajangersaasimaneranik aamma tunngaveqarluni ingerlanneqarpoq.
Siumut tunngaviusumik isumaqarpoq, Kommuneqarfik Sermersuup ajoraluartumik atorniartariaqalerneranut tunngatillugu suliaq ima kinguneqassasoq, marullummut inissisimaffigilersimasamut akuusimasut akisussaatinneqassasut. Ilutigisaanik Siumumut pingaaruteqarsimavoq, allagaatinik takunnissinnaatitaanermut aalajangersakkat nukittunerulersinneqarnissaat, taamaalilluni ingerlatseqatigiiffiit pisortat pigisaat ilanngutitinneqarlutik, kommunit ingerlataat ilanngullugit. Innuttaasummi akileraaratartut aningaasaataasa qanoq atorneqarsimaneri ammasumik saqqummiunneqartarnissaat pingaarutilerujussuummat.
Suliaq eqqortumik qulaajarneqassappat Siumumut aamma pingaaruteqarsimavoq, ingerlatsisimanermut annertusisamik allaannaannulluunniillu attuumassuteqanngitsumik misissuisoqassasoq, misissuinerlu periataarsinnaasunik (taskforce) malitseqartitsiviusumik ingerlanneqassasoq, aamma siusinnerusukkut ingerlatsinermut Deloittep misissuisimanera ilanngullugu misissuiffigineqassasoq. Misissuinermut ilanngutitinneqassaaq NCD A/S aamma Iserit A/S, tassani aalajangiisarsimanerit tamakkiisumik qulaajarneqassallutik, tassungalu atatillugu aningaasatigut iliuuserisimasat paasineqassapput kinguneqartitsivigineqarlutillu.
Misissuineq ineqarneq pillugu suliamut aningaasatigut ingerlatsisimaneq pillugu immikkut nakkutaqarluni ingerlanneqassaaq tassungalu atatillugu aningaasartuutaasimasut qulaajarlugit tamaasa, soorlu namminersortunut isumaqatigiissusiortarsimanerit, suliariumannittussarsiuussinernut suliniutinullu periuserisimasat aamma nunaminertanik tunniussisarnerni periuserisimasat tamaasa.
Siumumut pingaaruteqarsimavortaaq, inuit ataasiakkaat aningaasanik atuisinnaasimasut, atsiorsinnaatitaasut assigisaanillu pisinnaatitsissutillit iliuuserisarsimasaat qulaajaaffigineqassasut, kommunimut aningaasatigut namminneq soqutigisaat aamma suliunnaarnermi/soraarsitaanermi isumaqatigiissutit ilanngullugit.
Siumup maluginiarpaa, Kommuneqarfik Sermersuup “marullummut” inissinnera Nuup illoqarfianut iliuuserisimasanut tunngassuteqarmat, taamaattumik Siumumut pingaaruteqarsimavoq illoqarfiit nunaqarfiillu sinnerisa eqqornerlunneqannginnissaat qulakkeerniassallugu. Siumumut pingaaruteqarpoq, nuna tamakkerlugu aningaasaqarnikkut eqquinerluttoqarani ingerlariaqqittoqassasoq.
Suliamut tunngassuteqartut tassa ukiunut 2016-2022-imut tunngasut, pillugu Kommuneqarfik Sermersooq annertusisamik nakkutigineqalernerata saniatigullu aamma misissuinerit politikikkut qanimut malinnaaffigeqqissaarneqassasut, misissuinerlu kingusinnerpaamik 2023-mi junimi naammassineqassasoq. Misissuineq ingerlanneqartillugu kommuni sukannersumik nakkutigineqartussatut inissisimassaaq, aamma ingerlatsineq pitsaasoq qulakkeerniarlugu pisariaqassappat tamanna misissuinerup kingorna ingerlatiinnarneqassaaq.
Siumup aamma naatsorsuutigilluinnarpaa Naalakkersuisut assigiinngitsut, suliap qulaajaaffigineqartoq pillugu saqqummiussaqartarumaartut kiisalu sulinermi nakkutilliisoqarfik suleqatigalugu saqqummertoqartarumaartoq.
Siumumit aamma Naalakkersuisunut suliakkiutigineqarpoq, Kommunit ataatsimoorussamik soorlu KANUKOKA-tut ittumik suleqatigiiffeqalernissaat siunertaralugu suliat aallartinneqassasut, taamaasilluni kommunit tamarmik suleqatigiinnerat nukittorsarneqaqqinniassammat. Aammattaaq suliakkiutit ilagalugu kommunit aqunneqarnerat pillugu inatsit nutarterneqassasoq, suliarlu taanna kingusinnerpaamik 2024-mi upernaakkut naammassineqarsimassasoq.
Siumup pingaartippaa, sulinerup ingerlaqqinnissaanut tunngatillugu suliamut kusanaatsuliamut ilaasimasut akuerseqataasarsimasullu akisussaatinneqarnissaat kinguneqartitsiviussasoq.