Piniartut piniagassaarullutik aningaasarsiorfissaaruttut suliffissarsiortutut nalunaaginnarlutik ikiorneqaqquneqassanngillat. Naalakkersuisoq pineqartoq piniartunut qamannga pisumik utoqqatsertariaqartoq, Naalakkersuisullu kinguarsaanertaqanngitsumik suliassartik naammassissagaat Siumup naatsorsuutigaa
All.: Doris J. Jensen, politikikkut oqaaseqartartoq, Siumut
Isumaginninnermut, Suliffeqarnermut Nunamullu Namminermut Naalakkersuisoq ippassaammat avammut oqariartorpoq, piniartut piniagassaarullutik aningaasarsiorfissaaruttut suliffissarsiortutut nalunaaginnarlutik ikiorneqaqqullutik pisortanut saaffiginnissasut.
Siumup tamanna isumaqatiginngilluinnarmagu oqaatigissavara. Namminersorlutik inuussutissarsiortut, uani piniartut, pisortanut saaffiginniinnaqqullugit oqarfigineqarsinnaanngillat, Naalakkersuisutut ilutigisaanik naatsorsuutigisimagaanni inuussutissarsiornertik unitsissagaat.
Naalakkersuisut piniartunut taamak oqariartornerat ilungersunartutut isigaara, isumaqarpungalu naalakkersuinikkut suliassaq ilungersunartoq qarsupittumik suliariniarneqartoq. Sineriassuatsinni piniartut, Kulusummi solarip kuussimaneranik eqqugaasut ilanngullugit, inuussutissarsiornerminnut ikiuutaasinnaasumik noqqaallutik oqartussanut saaffiginnipput. Akissutaasinnaanngilaq inuussutissarsiutertik qimallugu nunamiunngorlutik ikiorsiissutinik pisartagaqalissasut.
Naalakkersuisut saaffiginnissutinut eqqortumik nalilersussallugit pisussaaffeqarput, Naalakkersuisullu qinnuigissavakka piaartumik saaffiginnissutit naammasseqqullugit. Pingaartippara pineqartut inuussutissarsiutaarunnissaat siunertarinagu Naalakkersuisut sulissasut.
Naggataatigut isumaqarpunga, Naalakkersuisoq pineqartoq piniartunut qamannga pisumik utoqqatsertariaqartoq, Naalakkersuisullu kinguarsaanertaqanngitsumik suliassartik tamanut atorneqarsinnaasumik naammassissagaat.