Christiansborgimi sapaatip akunnera pissanganartoq – danskit nutaamik naalakkersuisortaarput

Danmarkimi naalakkersuisooqatigiinnissamik isumaqatigiissuteqartoqarpoq. Naalakkersuisuulersussat isumaqatigiissutaanni Siumut sunniuteqaqataavoq.

Socialdemokratiet, Venstre aamma Moderaterne naalakkersuisooqatigiinnissamut isumaqatigiissuteqarput pingasunngormat.

Siumut tunuliaqutaralugu Folketingimut ilaasortaq Aki-Matilda Høegh-Dam novembarip aallaqqaataani qinersisoqareerneranit isumaqatiginninniarnerni peqataavoq.

Piumasaqaatitta arlaqartut isumaqatigiissummi peqataatinneqarnerat Siumut Folketingimit nuannaarutigaagut. Naalakkersuisooqatigiinnissamut isumaqatigiissutaanni Kalaallit Nunaata peqataatilluarneqarnera piumasarisimavarput, aamma tamanna tusaaneqarpoq, tamannalu aamma nuannaarutigaarput.

Naalakkersuisooqatigiilersuni nunanit avannarlernit partiit naalakkersuisooqatigiinnut tunuliaqutaapput. Tamannalu pissutigisaanik sunniuteqaqataalluarnissarput Siumumit naatsorsuutigaarput.

Qineqqusaarnermi Siumup qaqitaasa isumaqatigiissummi peqataatinneqarnerat nuannaarutigaarput. Naalakkersuisooqatigiinnissamut isumaqatigiissummi angusarisimasagut saqqummiutissallugit aamma tulluusimaarutigaarput. Isumaqatigiissutaasut tassaapput:

  • Danmarkip oqartussaaffii nunatsinni inerisarneqassapput
  • Oqartussaaffiit sumiginnakkat ullutsinnut naleqqussarneqassapput
  • Nunarput pineqartillugu nunarput aalajangeeqataasassaaq
  • Nunat allat pillugit paasissutissat tamaasa nunatsinnut anngunneqartalernissaat
  • Oqaluttuarisaanerput miserratigineqannginnissaa

Pisut saniatigut ataatsimeeqateqartoqarpoq, tassani ’Sugisaq’ ataatsimeeqatigineqarluni. Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen peqqinnissaqarfimmi pitsanngorsaanissamut qanoq suleqatigiittoqarsinnaanersoq Aki-Matilda Høegh-Dam ataatsimeeqataavoq.

Amerikamiut aallartitaqarfianni aamma Folketingimut ilaasortaq aaqqissuussinermi peqataavoq. USA-p Danmarkimut aallartitaa Alan Leventhal Aki-Mathilda Høegh-Damimik qaaqqusinikuuvoq, aaqqissuussamilu ’Women In Leadership Forum’-imi Aki-Matilda Høegh-Dam peqataalluni.

Siumut Folketingimi innuttaasut juullisiorluarnissaannik ukiumullu nutaamut iserluarnissaannik kissaassivoq.