Nunanik allanik niueqateqarnerup annertusartuarnissaa Siumup pingaartippaa, taamaammat nunat aalisakkanik avammut niuernitsinni suleqatigilluakkatta niueqatigiinnikkullu suleqatigilluartarnissaat pingaartinneqassaaq. Nunat sanilitta niueqatigiinnikkut suleqatiginerat annertusarneqassaaq, niuernermi aningaasartuutit appassinnerpaaffimmiitinnissaat ilanngullugu siunertaralugu.

Niuerneq eqqarsaatigalugu nunat suleqatigisatta nunattalu pisariaqartitaat tunniussinnaasaallu aallaavigalugit sulisutigut paarlaasseqatigiittarnissat anguniarnissaat Siumup pingaartippaa.

Nunatta EU-llu aalisarnikkut niuernikkullu isumaqatigiissuteqartarnerat nutarterneqartuassaaq, allatigullu nunatta EU-mik suleqateqarnera ineriartortinneqartuassaaq.

Nunatta WTO-mi ilaasortaanermigut iluaqutigisinnaasai annertusarneqassapput, ilaasortaanerullu malitsigisaanik akornutaasinnaasut qulaajarneqartariaqarput.

Nunatta NAFTA-mi ilaasortanngorsinnaanera nalilersorneqassaaq misissoqqissaarneqarlunilu.

Imminut pilersornerunissaq qulakkeerumallugu avataaniit eqqussukkat, nunatsinni tunisassiarineqareersunut unammillertut, akitsuusersorneqartarnissaat ammaffigissavarput, nunatsinni nioqqutissiorneq illersorumallugu annertusarumallugulu.

Nunat allat ilaasa nioqqutissaatitsinnik ataasiakkaanik eqqusseqqusinnginneri akitsuutitigulluunniit killilersimaarinninneri eqqarsaatigalugit nunat pineqartut Naalakkersuinikkut aallartitaqarnikkullu oqaloqatigisarnissaat pisariaqarpoq, killilersimaarinninnerit aaqqiivigineqarnissaat siunertaralugu.

Nilammik imermillu unammilleqatigiiffiusumik nioqqutissiornerit taakkunanngalu niuerutiginninnerit piaartumik annertusaavigineqassapput, taamaaliornissamullu akornutaasinnaasut aporfiusinnaasullu qulaajarneqassallutik. Imeq pisuussuterput nunatsinnut aningaasarsiutaanerunissaa Siumup aqqutissiuutissavaa.

Nuummi Talittarfissuaq atorluarlugu avammut niuernitta nunanut niuerfiusunut toqqannarnerusumik ingerlaalernissaa nunatsinnut iluanaarnarnerusumik ingerlalernissaa piaartumik suliarineqassaaq.

Kalaallit kulturitta avammut tuniniarnerunissaa nittarsaannerunissaalu siunertaralugu qanoq iliuusissatut tunaartassat pilersinneqarnissaat Siumup peqqissaartumik sulissutigissavaa, tamatumunnga ilaatillugu nunatsinni namineerluta filmiliortarnitta annertusarneqarnissaa.

Nunatsinni niueqatigiinneq
Pisortat namminersortullu suliffeqarfiisa akornanni niuernikkut periarfissat oqilisaavigineqartuassapput, soorlu assartuinermi akit, akitsuutit, akileraarutillu tungaasigut aaqqissuussinerit naleqqussartuarnerisigut. Akitsuusiisarneq pillugu inatsisissaq piviusunngortinneqassaaq.

Nioqqutissanik pilersorneqarnermi sumiiffinni assigiinngitsuni pilersuineq isumannaallisarneqassaaq, kiisalu akit sumiiffinni aamma sikusartuni inuuniarnermi nammakkuminarnerusunngornissaat siunertaralugu nutaamik aaqqissuussisoqassalluni, pingaartumik inuussutissat peqqinnartut tunisassiallu nunatsinneersut eqqarsaatigalugit.

Nunatta iluani nioqqutissiat suulluunniit Nunatsinni atuisartunit suliffeqarfinniillu atorluarneqarnissaat qulakkeerniarneqassaaq.

Nunatsinni atuisartut siunnersuisoqatigiivi kommuneqarfinnilu atuisartut ataatsimiititaliaat aaqqissuusseqqinnikkut suliassanik isumagisassanillu siunertaqarluartumik ingerlatsisinnaalernissaat qulakkeerneqassaaq.