Nanortallip napparsimaviani nakorsaqarniarnikkut atukkat piffissami sivitsortumi ilungersunarluinnaqqissaartumik inissisimasimapput, piaarnerpaamillu pissutsit aaqqiivigineqartariaqarput.
All.: Anders Olsen, Inatsisartunut ilaasortaq
Maanna qaammammik ataatsimik nakorsaqartitsisoqaraluartoq ataavartumik nakorsaqartitsinissaq qulakkeerneqartariaqarpoq, piffissamimi kingullermi piffissangaatsiaq nakorsaqartitsisannginneq kialluunniit akuerisinnaanngilaa toqqissisimassutigisinnaanagulu.
Nanortalik nunaqarfittaalu katikkaanni innuttaasut 1.500-t missaanniittut najugaqarput, taamaammallu peqqinnissaqarfitsigut toqqissisimasumik atugassaqarnissaq piffiit allat assigalugit illoqarfiup nunaqarfittaasalu pisinnaatitaaffigaat.
Nakorsaqartitsinnginnerup nalaani atukkat imaannaasarsimanngitsut innuttaasut oqariartuutigaat, allaat inuup inuuneranik naleqarsinnaasunik pisoqartarsimasoq oqaatigineqarpoq, iluatsitsinerinnakkullu ajornerusumik pisoqartarsimanani.
Ilisimaqqissaarpara Nuna tamaat peqqinnissaqarfipput annertuumik unamminartorsiortoq, pingaartumik sulisussat amigaatigineqaqisut ujartorneqartut Naalakkersuisut oqariartuutigisarmassuk. Qanorluunniilli pissutsit iliuuseqarfigineqarnissaat pinngitsoorsinnaanngilaq, Naalakkersuisullu suliassaq taanna naammassiniarlugu ilungersornerulissasut piumasarissallugu inissaminiittoq isumaqarpunga.
Inuiaqatigiittut naatsorsuutigisariaqarparput, Naalakkersuisut tunniutiinnartumik nipeqaratik suliassaminnik, ulluinnarsiutigalugulu isigisaminnik, naammassinninniarlutik sulinerminnik ilungersornerulissasut.