Kommune Qeqertalimmi kommunalbestyrelse immikkut ittumik ataatsimiinnissaa Siumut gruppiata piumasaraa. Kommune Qeqertalimmi allaffissornikkut aqutsineq pitsaanerusoq pilersinneqartariaqarpoq.
All.: Siumup gruppia, Kommune Qeqertalik
Kommunalbestyrelsip immikkut ittumik ataatsimiinnissaanut oqaluuserisassatut pingaarnertut uku qaqilerneqassasut Kommune Qeqertalimmi Siumup gruppiata kissaatigai:
1) Naatsorsuutit maangamut killiffiat sippuingaatsiartoqalernera eqqarsaatigalugu kommunip aningaasaqarnera pitsaasoq qulakkeerniarlugu kommunalbestyrelse sinaakkusiisariaqalernera pillugu oqaluuserisassanngortitsisoqassasoq.
2) Kommune Qeqertalimmi allaffissornikkut aqutsineq pitsaanerusoq Siumup kommunalbestyrelsimut piumasariniarpaa, Siumup gruppia isumaqarami kommunimi killiffik aallaavigalugu allaffissornikkut aqutsineq pitsaanerusoq qulakkeerneqartariaqartoq – kommunimi innuttaasut sullinneqarnerat pitsaanerusoq angujumallugu.