Suliat ajunngitsorujussuugaluartut atugassaritinneqartut akueriuminaapput. Tasiilami ullukkut atuartunut minnernut paaqqinnittarfik unnukkullu inuussuttunut sunngiffimmi ornigarneqartartoq ullutsinnut naleqqukkunnaarsimavoq. Illu inunnut 120-inut inissaqartitsisoq ukiut ingerlanerini allanngortiterneqartarsimalluni kimulluunniit toqqissisimanarunnaarsimavoq
All.: Dines Mikaelsen, Sermersuummi kommunalbestyrelsimut ilaasortaq, Siumut
Immaqa sakkortuumik oqarnerussagaluartoq, isumaqarpunga meeqqanut inuusuttuaqqanullu Kommuneqarfik Sermersooq sumiginnaasoq. Tassami meeqqat inuusuttullu toqqissisimanartumik isersimaarfissaqartinneqanngillat.
Atuisut meeqqat ullaakkut iseraangamik ilaatigut inuusuttuaqqanit aserorterisoqartarnera pissutigalugu tujormisinneqartarsimassaqaat. Suut iikkanut ikkussukkat meeqqanut naleqquttut ilikkagaqarnerunissamullu sammisut, soorlu kisitsisit naqinnerillu, piffissap sivikitsup iluani sequtserneqarsimasarput. Takornartaanngilarlu allaat igalaat seqummakut nalaanneqartarmata,
Sulisut suliaat meeqqanillu paaqqinninnerminni anguniagaat ajunngitsorujussuussut nalunngilavut, kisianni illumi ataatsimi aserorteriffiusumilu ajornartorsiut piusoq nalaallugu annernarpoq. Tupannanngitsuunngilarmi paasillugu, Tasiilami meeqqanut 6 – 14-inik ukiulinnut aamma inuusuttuaqqanut 14 – 21-nut ukiulinnut atugassarititaasut taamak ajortigimmata ullutsinnullu naleqqutinngitsigimmata.
Ulluni makkunani igalaat aserorterneqarsimasut taarsersorneqarput, meeqqallu allami inissaqartinneqannginnamik, sanasut isersimaqatigiinnarpaat. Kaattarpalussuaq ulapputtut, eqqissiveqannginnersuaq tassa kisimi. Aamma suna pinerpoq Sermersuummi Kangiani meeqqat pingaaruteqannginnerusimanermata, nakkutilliineq naammaginartumik ingerlanneqanngilaq. Kommunimi inoqarfinni sumi tamani paaqqinnittarfiit video atorlugu immiussissuteqartut, naagga illumi pineqartumi soqanngilaq. Meeqqalluunniimmi kavaajaminnut ilisivissaqanngillat.
Allanullu sanilliullugit pingaarnerunngissimaqimmata, qanoq pisoqassappat illu qimaaffissanik amigaateqarluinnarpoq, perusuersartarfiillu marluk inunnut 120-nut naammattutut isigineqarput. Meeqqat atualertussat iserterpata naatsorsuutigineqarpoq meeqqat 90-it angussagaat. Sulisut aqqanillit ilanngukkaanni ila atugaat imaanaanngeqaat. Naammagittaqaallumi.
Kommunalbestyrelsimut sinniisussatut qanittukkut ilaasortanngorpunga. Naatsorsuutigaara Kommuneqarfik Sermersooq, Naalagaaffiit Peqatigiiffiata inuit pisinnaatitaaffigisaattut aalajangersarsimasaanik, sumiiffiit allat assigalugit Kangiani aamma atuutsitsissasoq. Kommunimi tamanna qulakkeerniarlugu suliniuteqassaanga.