Kangaatsiarmiut coronamik tunillatsissimanerlutik paaserusukkunikku periarfissaqanngillat. Pingaartumik meeqqat atuarfiani atuartut misissuutissaqannginnerat toqqissisimananngilaq, meeqqallu atuarnerannut annertuumik tamanna akornusersuivoq
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Sila pissutigalugu qulimiguulik Kangaatsiamut tikissinnaasimannginnera pissutigalugu najugaqartut tunillatsisimanerminnik paasisaqarsinnaanngillat. Taamaammat misissuutit sinerissamut siammarneqassasut qangali Naalakkersuisut neriorsuutigisimasaat naak?
Kangaatsiarmiut innuttaasut misissortissinnaanissaat qulakkeerniarlugu Naalakkersuisut aamma Peqqinnissaqarfik naammattumik iliuusissanik allatigullu angallannikkut assartuussinikkullu periarfissarsiorsimanersut apeqqusernarsivoq, nassuiaateqarnissaallu pisariaqarpoq.
Kangaatsiamut suli anngussimanngippata illoqarfiit nunaqarfiillu amerlasuut eqqugaasimassasut qularnanngilaq.
Naalakkersuisut innuttaasunut neriorsuinertik piaartumik naammassisariaqarpaat, misissuutillu sinerissap sinnerani illoqarfinni nunaqarfinnilu qaqugu pissarsiarineqarsinnaalissanersut inuiaqatigiinnut paasissutissiissutigalugu.