Qaleralinniarnermut Aqutsivik tukattuliorfigineqarpoq

Pisassiissutit ukiumoortunngortinnissaanik Naalakkersuisut aalajangiigaluarneraniit qaammatit marluunngitsulluunniit qaangiupput. Maanna allarluinnarmut sangusoqarpoq. Tukattumik sangujoraartumillu Naalakkersuisooqatigiit aqutsiniarsarinerat unissasoq Siumumit ilungersorluta kissaatigaarput

All.: Karl Tobiassen, Inatsisartunut ilaasortaq, Siumut

Naalakkersuisut februaarip 10-ani aalajangerpaat qaleralinniarfiit Aqutsisoqarfik 47-miittut qaammatit pingasukkaarlugit pisassiiviusalissasut. Aalajangerneq siuliani aalajangernermut allanngortitsivoq, tassami ukiumut pisassiissuteqartoqartarnissaa naalakkersuisooqatigiittut, Inuit Ataqatigiit Naleqqallu, aalajangersimagaluarmassuk.

Pisassiissutit ukiumoortunngortinnissaanik Naalakkersuisut aalajangiigaluarneraniit qaammatit marluunngitsulluunniit qaangiupput, maannalu sammivik nassuiaatitaqanngitsumik allanngortinneqarluinnaqqissaarpoq.

Naalakkersuisooqatigiit oqalorusaarlutik neriorsuutigiuarpaat ”akuutitsineq”, ”peqataatitsineq” tunngavigalugit sulillutik aamma taakku sulinerminni ilisarnaatigissallugit. Kisianni neriorsuutit oqariartuutillu timitaqanngitsut maanna uppernarseqqiinnarparput.

Anguniakkat akuutitsinerlu naak?
Naalakkersuisooqatigiit sinerissap qanittuani aalisarnerup ineriartorfiulluni ingerlatsiffiunissaanik qanoq politikikkut siunnerfissaasuatiginertik ataatsimoorfeqanngilluinnarnertillu kikkunnut tamanut nittarsaappaat.

Naak peqataatitsiniarluni oqarluartaarutit utikajaarneqartut? Naak ammasuunissamik akuutitsinissamillu oqarluartaarutit utikajaarneqartut?

Allannguisarnerit taama annertutigitillugit pisariaqarluinnarpoq atuisut akuutillugit peqataatillugillu allannguutissat tusarniutigineqartarnissaat. Matumani pineqarput nunatta aningaasarsiorneranut qitiulluinnarlutik inissisimasut, pineqartullu oqariartuutaasa tusarnaarnissaat pingaaruteqarluinnarpoq.

Akuersaarneqarsinnaanngilaq piffissap taama sivikitsigisup iluani atuisunik tusarniaannguarani aammaarlunilu suusupaginnilluni aalajangersaasoqaqqimmat. Pissutsit tamakku inuiaqatigiinni ajoraluartumik ulluinnarsiutigilerpavut.

Naalakkersuisooqatigiit anguniakkaminnik ataatsimoorussinngilluinnarnerat nunattalu aningaasarsiornikkut napatitsisuisa pingaarnersaanut suusupaginnitsigisumik ingerlatsilernerat akuersaarneqarsinnaanngilaq ernumanarluinnarlunilu.

Aalisarnermut inatsisissamik suliaqarneq aallartisarniarneqaleruttorpoq, taamaattumik taama tukatsigisumik sangujoraartigisumillu sinerissap qanittuani qaleralinniartunut Naalakkersuisut aqutsiniarsarinerat unissasoq Siumumit ilungersorluta kissaatigaarput.