TUSAGASSIUTINUT NALUNAARUT
Ukioq manna umiarsuaq pilersuisoq kingulleq aallangajalerpoq. Tasiilamili ukiuunerani innaallagissamik pilersuineq Naalakkersuisut qulakkeersimavaat? Inatsisartunut ilaasortaq Lars Poulsen, Siumut, Nukissiutinut Naalakkersuisumut Jørgen Rosbachimut maanna erseqqissumik akissuteqaqqusivoq.
– Tasiilami ilaqutariit, utoqqaat, suliffeqarfiit sullissiviillu innaallagissamik aalajaatsumik pilersorneqartariaqarput. Ukiuunera qanillisoq innuttaasut qamittoornissamik ernumassappata tamanna akuerineqarsinnaanngilaq. Naalakkersuisup Jørgen Rosbachip akisussaaffini tigullugu pilersuinerup isumannaarneqarsimanera uppernarsartariaqarpaa, Lars Poulsen oqarpoq.
Lars Poulsenip februaarimi 2022-mili Tasiilami erngup nukinganik nukissiorfiup allineqarnissaa Inatsisartunut siunnersuutigaa. Alliliinissarli unitsikkallarneqarpoq. Aamma 2026-mut aningaasanut inatsit pillugu isumaqatigiissummi naqissuserneqarpoq Tasiilami innaallagissamik pilersuineq aalajaatsuunngitsoq piaartumillu aaqqiivigineqartariaqartoq.
– Ajornartorsiut nutaajunngilaq. Naalakkersuisut ilisimareerpaat. Taamaattumik pilersaarutinik neriorsuutinillu saqqummiussisarneq naammanngilaq. Ukiuunerani pilersorneqarnissartik qanoq qulakkeerneqarsimanersoq innuttaasunut nassuiaatigineqartariaqarpoq. Nukissiorfiup allineqarnissaata kinguartinneqarnera isumannaatsumik pilersuinissamik akisussaaffimmit qimarratiginninneruvoq.
Lars Poulsenip piumasaraa Naalakkersuisut sillimmatitut innaallagissiuutit naammannersut, ikummatissaq kingoraartissallu pisariaqartinneqartut pigineqarnersut kiisalu ajutoortoqassagaluarpat upalungaarsimanermut pilersaarut qanoq ittuunersoq piaartumik tamanut saqqummiutissagaat.
– Umiarsuaq pilersuisoq kingulleq aallareerpat iliuuseqarnissamut periarfissat annikillissapput. Taamaattumik Naalakkersuisoq Jørgen Rosbach maanna akissuteqartariaqarpoq: Tasiilaq ukiuunerani isumannaatsumik innaallagissamik pilersorneqarnissaminut piareersimava? Innuttaasut toqqissisimanissaat Naalakkersuisunit salliutinneqartariaqarpoq. Ajornartorsiut ajornerulersinnagu piaarnerpaamik iliuuseqartoqartoqartariaqarpoq, Lars Poulsen naggasiivoq.