Aalisarnermut inatsit nutaamik taarserniarneqarmat tamanna pissusissamisoorpoq, aamma nutaassamut isumaliutissiissut paasiuminaatsortaqaqaaq. Inuiaqatigiillu oqallisigisaasigut eqqarsaatit pinngorartarput, taakkulu ilaannik saqqummiussilaarpunga.
All.: Lars Karl Jensen, Nuuk
Isumaliutissiissutip ukiuni ikittuujunnaartuni arlaleriartumik saqqummiunneqartarneratigut maluginiagassaasarpoq kinguartitsisoqaraangat uparuartuisuunikuusut suleriaqqinnissani ataatsimiititaliami ilaasortanngortartut, malitsigisaraalu ilaasortaalersut tunuliaqutaminnik aalisarnerup iluani iluanaarutissanik pissarsinissaq sunniuteqarfiginiartaraat.
2012-imi saqqummiinerup kinguartitsinerullu kinguninngua, aalisakkerinermik suliaqartunik suliffissaqartitsiniarneq pillugu KNR-ikkut oqallittoqallarmat, tunisassiorfinni sulisut aalajaannerunissaat oqallissutaaqaaq, kinguneranilli sulisut atugaasigut aningaasarsiaasigullu pitsanngorsaasoqarnersoq maannamut malunnartoqanngilaq.
Ullumikkumut suli sulisussaaleqisarneq tusarsaajuarpoq, kiammi aamma aalisakkerisutut suliffik kajumigissammagu; suliassaaruttorlu angerlartiinnarneqartassagaanni socialimut qinnuuloortussanngortitaalluni.
Pisuussutit uumaatsut uumassusillillu nunatta pigai oqartussaaffigalugillu
Arajutsisimanngikkuma inatsisip taarserniakkap atuunnerani pissutsit atuisut ilaannit naammagineqanngeqisut, nutaassami sutigut qanorlu politikeqarfigineqassanersut takussutissaqanngilaq.
Kvotit aamma Licensit inatsisartutigoortuik atuutilermata eqqaamaniarpara, inatsisissamut oqaasertaliussaasoq ”angallatip ajutoorluni aalisarsinnaajunnaarallarnermi pisassat pigisat akilersillugit attartortinneqarsinnaasut piginnittup akilersuineranut iluaqutaanissaat siunertaralugu”.
Isumaqarnarpoq tamanna kukkunikkut siamasinnerusunut ”pisassanik nioqquteqarsinnaanermut” ammaanneqarsimasoq, inatsimmik nutarteraluni allannguinikkut aaqqittariaqartumik. Makkua ersarissumik politikeqarfigineqartariaqartutut isumaqarfiginarput:
- Inuit ataasiakkaat angallateqaratik pisassiissutinik pigisaqalernikut taamatut ingerlaannassanersut.
- Pisassaateqarnatik nutaanik atornikunilluunniit angallatitaarnissamut akuerisat angallammut ilaareersunik pisaartariaqartarnissaat pisariaqartoq, pisassanik akisoqisunik nammakkersorneqannginnissaat qulakkeerniarlugu.
- Pisassiissutit inummut allagartalernagit angallammut aallagartalerneqarnissaat aqqutissiuunneqassasut.
- ESU-mit tapiissutisilluni umiatsiaaqqat killeqanngitsumik pissarsiarisarnerat ingerlaannassanersut.
Ukiunimi kingullerni maluginiagassaavoq aasaraangat aalisariutit inuttassaaleqilersartut ukiukkullu paarlattuanik ikiffissaaleqisoqalersartoq, aamma takussaasaqaat ukioraangat umiatsianik inuussutissarsiutinik tuniniaasut amerlisittarnerat.