Januaarip qulingiluaanni Norgep inatsisartoqarfia, Stortinget, aalajangerpoq immap iternani aatsitassarsiorneq periarfissiissutiginiarlugu. Aatsitassarsiorfissatullu tikkuarneqartoq Nunatta kangiani killeqarfitsinnut qanittumiimmat tupinnanngitsumik apeqqutit uatsinnuttaaq tunngasut akineqartariaqarput.
All.: Doris J. Jensen, politikikkut oqaaseqartartoq
Taamaammat Nunat Avannarliit Siunnersoqatigiiffianni ilaasortatut Norskit naalakkersuisui apeqquteqarfigaakka, qanoq iliorlutik immap iternani aatsitassarsiortoqalissagaluarpat aalisakkanut piniagassanullu akornusiinnginnissaat qulakkeerniarneraat.
Pingaarpoq ilanngullugu ilisimalissallugu Norskit naalakkersuisui pilersaaruteqarnersut, norskit misileraanissaanut atatillugu ilisimalikkanik avitseqatigiittarnissaq siunertaralugu Nunani Avannarlerni naalakkersuisut allat suleqatiginissaanut aallartitsissallutik pilersaaruteqarnersut.
Qulakkeerniagassaraarput immap iternani aatsitassarsiortoqalissagaluarpat Nunat Avannarliit allat aalisarnerannut piniarnerannullu sunniutissai minnerpaaffissaminiitsinnissaat.
Naalakkersuisut ilanngullugit kajumissaarusuppakka Norskit naalakkersuisuinut saaffiginneqqullugit, Nunattalu eqqaralaani pilersaarutaasut pillugit aaqqissuussaasumik oqaloqatigiinneq aallarteqqullugu.