Kommune Kujallermit Nanortaliup aninissaa siunertaralugu innuttaasunit taperserneqarnersoq pisortatigoortumik paaserusullugu innuttaasut taasitinneqarnissaat februaarip 14-iani kommunalbestyrelsimut oqaluuserisassanngortippara
All.: Anders Olsen, Kujallermi kommunalbestyrelsimut ilaasortaq, Siumut
Nanortalimmi nunaqarfittaanilu innuttaasut amerlasuut kissaatigaat Kommune Kujallermiit anillutik namminerisaminnik kommuneqaqqilernissartik. Tamanna innuttaasut ulluinnarni naapittarnerini, ataatsimiisitsisoqarnerani allatigulluunniit saaffiginnissuteqartarnerisigut oqariartuutaajuarpoq.
Tamassumap innuttaasuniit ilumut amerlanerussuteqartunit kissaataanersoq pisortatigoortumik paasisaqarfigissallugu pingaaruteqartoq isumaqarpunga, taamaammallu tusarniaaneq taasissutissartalik piviusunngortinneqarnissaa qulakkeerumallugu Kommune Kujallermi kommunalbestyrelsimi oqaluuserisassanngortitsivunga, tamannalu ataatsimiinnissami tullermi, tassalu 14. februar 2024 oqaluuserineqassasoq piumasaraara.
Ilisimavarattaaq innuttaasut apeqqummut tassunga tunngatillugu atsiornernik katersisut.
Siunnersuut akuersissutigineqassappat innuttaasut upernaap ingerlanerani taasitinneqarnissaat pisariaqarpoq, tassani Nanortalimmiut nunaqarfittaaneersullu namminerisamik kommuneqaqqilerusunnersut imaluunniit Kommune Kujallermiiginnarusunnersut taasitinneqarnermikkut aalajangiiffiginiassammassuk.