Inuutissarsiutinut ilinniartitaaneq
Iliniartitaaneq inuussutissarsiutinut inuiaqatigiinnullu naleqqussarneqarneqarlunilu nukittorsarneqassaaq – inunnut iluaqutaasumik nunattalu ineriartorneranut ikorfartuisumik.
Ilinniarnermut aningaasaliinerunissaq Siumup sulissutigiuarpaa. Suliffinnik nutaanik aallartitsiniarnissaq siunertaralugu ilinniarfimmik pilersitsinissaq anguniarneqarpoq. Inuussutissarsiornikkut ilinniartitaaneq annertusarneqassaaq, inuiaqatigiit pisariaqartitaat aallaavigalugit inuussutissarsiornermilu susassaqartut suleqatigalugit.
Suliffeqarnermut suliniaqatigiiffiit suleqatigalugit ilinniarsimasunik pisariaqartitsineq naammassiniarlugu ilinniartitaaneq annertusartuarneqartariaqarpoq, inuussutissarsiutitigut sulisutigullu pissutsit aallaavigalugit.
Teknikikkut aamma niuernikkut ilinniartitaanernut amerlanerusut ilinnialertarnissaat qulakkeerniarlugu inuussutissarsiutitigut ilinniarnertuutut ilinniarnerit annertusarneqassapput; tassaasut HTX aamma HHX.
Qitiusumik ilinniarfinnut noqqaasoqartillugu peqataasussaqartillugulu tulluartunik sivikinnerusunillu ilinniarnernik ingerlaqqiffiusunik neqerooruteqartoqartassaaq.
Ilinniakkat ataasiakkaat pitsaasumik imaqarnissaat qulakkeerniarlugu ilinniartitaaneq eqaatsuusariaqarpoq. Ilinniartitaanerit inuussutissarsiornermut tunngassuteqartut sutigut tamatigut qaffassarneqartariaqarput nunatsinnilu pisariaqartinneqartunut naleqqussarneqartariaqarlutik, Danmarkimi periutsit malillugit aaqqissuussisarneq qimanneqartariaqarluni.
Inuussutissarsiutinut ilinniarneq, qaffasissumik ilinniaqqissinnaanissamut ammaassisuussaaq, taamaattumik ilinniarfiit ilinniartitsinikkut ilinniusiornikkullu inerisaavigiuartariaqarput.
Issittup imartaani imarsiornermut ilinniarfik nunatsinni Imarsiornermik Ilinniarfimmut nutaamut ilaatillugu pilersinneqassaaq. Issittup imartaani angalanermut piumasaqaatit allaapput, taamaattumik nunatsinnut iluaqutaasussamik ilinniartitaanikkut aaqqissuussinissaq Siumup siunertaraa. Issittumi angallassisarsinnaanissamut allagartartaarsinnaanissaq anguniarlugu immikkut ilinniartitsisoqartassaaq. Umiarsuarsuit nunarput eqqaqqullugu ingerlaartartut piumaffigineqartalissapput issittumi angallassisinnaanermut allagartalinnik aqumioqaqqullugit. Issittumi umiarsuarnik angallassisinnaanermut allagartaqarnissap piumasaqaataalernissaa, nunarsuarmi akuerineqarnissaa anguniarneqassaaq.
Ullumikkut nunatsinni imarsiornermik ilinniarfeqarneq ullutsinnut naapertuuttumik ineriartortinneqassaaq. Taamaattumik Siumup sulissutiginiarpaa imarsiornermik siunertaqartumik ilinniartitaasarnerit tamarmik pitsaassutsikkut pisariaqartinneqartunullu naapertuuttumik aaqqissuuteqqillugit qaffassarnissaat – ilaatigut Imarsiornermik Ilinniarfimmi skibsassistentiniit naalakkanut ilinniarnerit qaffassarneqartariaqarput, minnerunngitsumillu tamakkua ilinniagassatut periarfissat inuusuttunut kajuminnarnerusunngortinneqarlutik. Umiarsuarni naalakkat, aquttut, aqumiut ilinniarsimasut kalaallit, Kalaallit Nunaata imartaani aalisarnermik ingerlatsinermi tamakkiisumik atorneqarluartariaqarmata, aalisarnikkut nunatta killeqarfiinik nakkutilliisutut ilinniartitseqqinnikkut atorfinitsinneqartalernissaat Siumup anguniassavaa.
Umiatsiaararsortunut angallatersortunullu ingerlatsisinnaanermut ilinniarfimmik pilersitsinissaq Siumup sulissutigissavaa.
Nunatsinni inuussutissalerinermut ilinniarfik INUILI ineriartorteqqinneqartariaqarpoq, nunatta pisuussutaanik atuinissamut passussinissamullu ilinniarnerit annertunerujussuarmik aallunneqartariaqarlutik.
Qaffasissumik inuussutissalerinermik ilinniarsinnaanerit nunatsinni ilinniarneqarsinnaanngornissaat sulissutigineqartariaqarpoq.
Inuk tatigalugu – siunissaq upperalugu.