Siunissami inuiaqatigiit atugarissaartut ilinniarluarsimasunik nutaaliullaqqittunillu innuttallit pilersinneqarnissaat qulakkiissagutsigu ilisimasat nutaat annertunerusullu pisariaqarput. Taamaattumik Siumut ilisimatusarluni ilinniartitaanerit eqqarsaatigalugit annertunerusumik iliuuseqarniarpoq.
Nunatta pisariaqartitai sulisoqarnermilu pisariaqartitat aallaavigalugit siunissami ilisimatusarneq ineriartortinneqartariaqartoq Siumut isumaqarpoq. Tamatumani nunatsinni aningaasarsiornikkut tunngavigisagut aallaavigalugit, suliassaqarfinni tamani qanoq iliornikkut inuiaqatigiinnut pissarsissutaanerpaamik aaqqissuussisinnaanerit pillugit ilisimatusarnerit immikkut annertusarneqarnissaat sulissutigineqassaaq.
Ilisimatusarneq inuussutissarsiornermi nukittunerulersitsissaaq, aningaasatigut kulturikkullu ajornartorsiutinik aaqqiiniarnermi aqqutissiuissagami inuiaqatigiinnilu inerisaanermik annertunermik pilersitsissalluni.
Ilisimatusarfinni allanilu ilisimatusarnermik suliaqarfiusuni amerlanerusunik atorfinitsitsisoqartariaqarpoq, ilisimatusarneq orniginartuusariaqarmat pitsaasunillu atugassaqarfiulluni.
Nunatsinni ilisimatusarnermi paasisat inernerillu katersorneqartariaqarput. Nunanit allanit nunatsinnut ilisimatusarnermik ingerlataqartut pinngitsooratik kalaallinik suleqateqartarnissaat, aammalu ilisimatusaqateqartarnissaat.
Nunatta issittoq avatangiisit pinngortitarlu pillugit ilisimatusarfeqalernissaa Siumup pimoorullugu sulissutigaa.
Aalisakkat sammillugit qaffasinnerusumik ilinniarsinnaaneq aallartinneqassaaq, pitsaassuseq, naleqarnerulersitsineq assigisaallu ilinniagassatut neqeroorutigineqarlutik.