Siumup siunertaraa inuussutissarsiorneq arlalinnik tunngavilik nunanullu allanut unammillersinnaasoq piorsassallugu. Inuussutissarsiutitigut assigiinngiiaartumik aningaasarsiornikkut toqqammaveqarnissaq anguniarlugu suliffeqarfinnut atugassarititaasut ataavartumik eqaannerulersillugillu pitsanngorsarneqassapput.
Kalaallit Nunatsinni Inuussutissarsiornermi pingaarnertut tunngaviupput Aalisarneq, Suliffissuaqarneq, Aatsitassarsiorneq, Takornariaqarneq Erngullu nukissiorsinnaanera iluaqutigalugu tunisassiorneq. Assigiinngisitaartumik tunngaveqarluni inuussutissarsiornikkut inerisaaneq nunarujussuarmik nunaqarnitta malitsigisaanik atorluaanissarput pingaaruteqarpoq. Taamaammat nunalerineq uumasuuteqarnerlu ukiut 100-t sinnerlugit nunatsinni piujuarsimasoq nutaaliornikkut ineriartorteqqinneqassasoq Siumut isumaqarpoq. Issittup inoqarneranik pingaarnertut nunarsuarmut oqariartorneq kulturi aqqutigalugu suaarutigineqartarpoq taamaammat filmiliornermik inuussutissarsiuteqarnerup annertusarnissaa aningaasarsiornikkut siuarsartuartariaqartoq Siumut isumaqarpoq.
Nunarput nammineq filminstitutimik pilersitsissasoq sulissutigineqassaaq, avataaninngaanniit filmiliorniarlutik nunatsinnukartut isaavissaat. Tassunga atatillugu filmiliornermut inatsit aaqqissorneqarnissaa sulissutigineqassaaq.
Innuttaasoq kinaluunniit inuussutissarsiutinik nammineerluni ingerlataqarnissamut piumassuseqartoq namminersorluni ingerlataqalernissamut periarfissaqartinneqartariaqarpoq. Inuussutissarsiutitigut tapiissutaasartut pitsaanerusumik kinguneqarnerusumillu atorneqartalernissaat siunertaralugu aaqqissuusseqqittoqassaaq, nunami sullivinnik nutaanik nioqqutissiorfiusunik pilersitsiortornissaq siunertaralugu. Piorsaanissami suliffeqarfinnillu amerlanerusunik pilersitsiniarnermi namminersorlutik suliffeqarfinnik pilersitsiniartut pisortaniit tapersersorneqartarnerat siunertaqarluartumik piorsarneqassaaq.
Pisortat inuutissarsiutinik ingerlatsisinnaapput, taamaaliornermili niuernermut unammilleqatigiinnermilu periaatsit atuuttut malinneqassapput.
Ingerlatseqatigiiffiit pisortanit pigineqartut siulersorneqarneri eqqarsaatigalugu nunatsinni nunaqavissut atorluarneqartassapput salliutinneqartarlutillu, taamaaliornikkut aamma suliassaqarfinni assigiinngitsuni ilisimasatigut pigineqalersartut annertusiartussammata. Tamatumani Namminersorlutik Oqartussat aktianik piginneqatigiiffiinut piginnittuunermut politiki, partiit amerlanerpaartaasa akornanni isumaqatigiissut ingerlaavartumik piviusunngortikkiartuaarneqarnerani Siumup suleqataanera ingerlaavartumik nalilersorneqarlunilu inerisarneqassaaq.
Nunatsinni tunisassiornerup illersornissaa Siumup pingaartippaa, taamaaliornikkut akilersinnaasumik unammillersinnaassuseqartumillu ingerlatsiuarnissaq qularnaarneqarsinnaammat.
Pisuussutitta uumassusillit sapinngisamik tunisassiassatut piareerlugit, taamaaliornermilu naleqarnerulersillugit annissorneqartarnissaat anguniarneqassaaq. Tamatumani nunani sanilerisatsinni misilittakkat iluaqutiginiarneqassapput.
Inuussutissalerinermut oqartussaanerup nakkutilliinerullu Danmarkimiit Nunatsinnut nuunneqarnissaa Siumup piviusunngortissavaa, Namminersorneq pillugu inatsisimmi sinaakkusiussat aallaavigalugit.