Kalaallit ilaqutariit Danmarkimi najugaqartut kommuninit sullinneqarnerat pillugu misissuineq maanna saqqummersinneqarpoq. Qanorluunniit ajornartorsiutinut pissutaasutut isornartoqaraluartoq kisitsisit tunngaviusut politikerinit isiginngitsuusaarneqarsinnaanngillat
VIVE-p misissuinissanut aningaasaliisoqarnissaa Siumut tunuliaqutaralugu Folketingimi ilaasortap Aki-Matilda Høegh-Dam qularnaarnikuuaa, misissuinerullu maanna nalunaarusianngorlugu saqqummiunneqarnera nuannaarutigaa. Kalaallit Danmarkimi najugaqartut kommuninit sullinneqarnerat tassani nalunaarusiarineqarpoq.
– Misissuisimaneq naapertorlugu maanna suleriaqqinnissamut toqqammavissaqalerpugut. Qanorluunniit ajornartorsiutinut pissutaasutut isornartoqaraluartoq kisitsisit tunngaviusut politikerinit isiginngitsuusaarneqarsinnaanngillat. Qineqqusaarutikka piviusunngortinneqartut ilapput, taamaasilluni Kalaallit Danmarkimi najugaqartunut inatsisitigut isumannaatsumik ingerlatsisoqarnissaa maanna sulissutigisinnaanngorparput, Aki-Matilda Høegh-Dam oqarpoq.
Kalaallit meerartaat Danmarkimi najugaqartut angerlarsimaffimminnit qimagutsinneqartarnerat pillugu sukumiisumik misissuisoqarnissaanut aningaasaliisoqarnera Folketingimi ilaasortamit aningaasanut inatsisissamut isumaqatiginninniarnermi 2020-mi Siumup folketingimi ilaasortaatitaata qulakkeerpaa. Folketingimi Kalaallit Nunaat pillugu ataatsimiititaliami pineqartoq arlaleriarluni Aki-Matilda Høegh-Damimit arlaleriarluni qaqinneqartarsimagaluarpoq, partiinilli allanit ilalerneqartarsimanngikkaluarluni. Taamaattumik Christiansborgimi suliaq pillugu allamik isumaqartoqalersimanera Aki-Matilda Høegh-Damip nuannaarutigaa.
– Ataavartumik assigiinngisitsisoqartarsimanera Kalaallit Nunaat pillugu ataatsimiititaliamit akuerineqarsimanngikkaluartoq, suliap ingerlaqqinnissaa misissuisoqarnissaalu piumasariuarsimavara. Naak politikerinit allanit isumaqatigineqanngikkaluarlunga suliaq tunniutiinnarfiginngilara. Soqutigisaqaqatigiit ‘Mentor Immanuel’ suleqatigalugit tusarnaartoqalernissaa tikillugu sukataarpugut, Aki-Matilda Høegh-Dam oqarpoq.
– Ernumassutigisarali maanna ajoraluartumik uppernarsineqarpoq. Sukumiisumik misissuisoqarnissaa ’Mentor Immanuel’ suleqatigalugu sukataareerluta misissuineq saqqummiunneqarmat paasivarput kalaallinut Danmarkimi najugaqartunut ataavartumik sumiginnaasoqartoq. Maanna paasisat naapertorlugit erngertumik suleriartoqaqqittariaqalerpoq!, Aki-Matilda Høegh-Dam oqarpoq.