Kangiani aalisarnermut ikaarsaarnissaq piaarnerpaamik aallartittariaqarpoq

Kangiani aalisartuunermut ikaarsaarnissaq piffissanngorpoq, pisariaqavissumik ineriartorneq aallartinneqassappat. Tamatumani avaqqunneqarsinnaanngillat Naalakkersuisut. Apeqqummut qanoq piumassuseqartiginersugut akissutissaqartittariaqarparput. Oqaluinnarneq ullut ingerlanerini unilluni iliuuseqarnissaq tullinnguuttariaqartarpoq

All.: Lars Poulsen, Inatsisartunut ilaasortaq, Siumut

Inatsisartunut qinigaaffik una aallartittorlu, Siumumit sakkortuumik Naalakkersuisunut kaammattuuteqaqattaarnerput aallartissimavarput, piumasaqarluta Nunatta Kangiani – Kujallermilumi – aalisarnerup piaartumik ineriartortinneqarnissaanut pimoorussisoqarluni suliniuteqarneq aallartinneqassasoq.

Tamannalumi Inatsisartuni oqaluuserineqarsimavoq, naqissuserneqarluni Kangia eqqarsaatigalugu pisassiissuteqarneq ajornartorsiutaanngitsoq, sumiiffimmi sinerissap qanittuani aalisakkat pisassiissuteqarsimanikkut killilersorneqarsimanngimmata.

Taamak inissisimasoqarnera ilisimareeraluarparpummi, amigaatigisarpullu unaaneruvoq, qanoq tamatta inuiaqatigiittut sumiiffimmi aalisarnikkut ineriartortitsinissamut piumassuseqartiginersugut akissutissaqartissallugu. Tassanilu avaqqunneqarsinnaanngitsutut isigaakka Naalakkersuisut, naatsorsuutigineqarsinnaanngilarmi namminersortut annerusumik ineriartornermik aallartitsissasut. Ulloq mannami tikillugu tamanna takusimanngilarput, aamma Nunatta Kangiani aningaasaatilissuaqanngilaq aallartitserusussuseqarpaluttunik.

Aalisarnikkut sakkussat aalisariaatsinullu assigiinngitsunut atortut eqqarsaatigalugit, sumiiffimmi ikaarsaariarnerunissaq siunertaralugu ilinniartitsilluni aallartinnissaq qitiusumit aningaasaliiffigineqartariaqartoq isumaqarpunga. Nunatta Kangiani malunnaatilimmik inuussutissarsiornikkut siuariassagutta, una qinigaaffik naatinnagu aalisarnikkut periarfissat tamaasa atorlugit politikikkut iliuuseqartariaqartugut tamatta nalunnginnguatsiarparput.

Pisariaqavissumik ineriartorneq aallartinneqassappat, aalisartuunermut ikaarsaarnissaq massakkut piffissaavoq. Tamanna siunertaralugu politikikkut akuleruttariaqartugut isumaqavippunga, tassami Nunatta Kangiani ineriartortitsinissaq annertunerusoq aallartittariaqartoq tamatta nalunngilarput, inuiaqatigiittullu piumasarisariaqarlutigu.  

Oqaluinnarneq ullut ingerlanerini unilluni iliuuseqarnissaq aallartittariaqartarmat, naatsorsuutigaara Inatsisartuni upernaaq manna pineqartoq oqallisigineqarmat Naalakkersuisut suliassaminnik paasinnissimassasut. Taamaanngippat Inatsisartutigoorluni oqaluusereqqinneqarnissaanik suleqataaqqinnissara neriorsuutigissagakku oqaatigissavara.