Illorsuit ammaqqinneqarnissaat pillugu apeqquteqaat

Inatsisartunut Ilaasortaq Erik Jensen

Inatsisartut suleriaasianni  §  37 imm. 1 naapertorlugu Naalakkersuisunut apeqqut imaattoq matumuuna saqqummiuppara:

Naalakkersuisunut apeqqut:

  1. Naalakkersuisut Illorsuit ammaqqinneqarsinnaanissaanut suliniuteqarpat?
  2. Qanga kingullermik Illorsuit ammaqqissinnaanera pillugu Naalakkersuisuni isummerfigineqarpa? Qaqugulu nutaamik isummerfiginiarneqarpa?
  3. Naalagaaffiup Illorsuarmiut peqatigiiffianut tapersersuiniarsimanerugaluat Naalakkersuisut itigartitsisimanera sumik tunngaveqarpa?
  4. Naalakkersuisut Illorsuarmiut peqatigiiffianut tapersersuippat?
  5. Naalakkersuisut Illorsuarmiut peqatigiiffiata tapiiffigineqarnissaannut kukkusimanertik nassuerutigisartik aaqqiiffiginiarlugu aningaasaliissutaasussaagaluit matussusernissaannik pilersaaruteqarpat?
  6. Naalakkersuisut allanik paasissutissaasinnaasunik peqarpat?

Tunngavilersuut:

Siumut ataatsimeersuarnermini siunnerfigivaa anguniagaralugulu Illorsuit ammaqqinneqarnissaannut inoqaleqqinnissaanut sulineq pimoorullugu ingerlanneqassasoq. Tamannali piviusunngussappat Naalakkersuisut tunngaviliisuussussaammata apeqqutinik suliaqarpunga.

Taamatuttaaq aamma maanna paasisimaleratsigu Naalakkersuisut Danskit aningaasanut inatsisaatigut Illorsuarmiut peqatigiiffianut tapersersuinissamut Naalakkersuisut itigartitsisuusimasut, Aningaasaqarnermullu Naalakkersuisoq tusagassiorfitsigut kukkusimanerminik nassuerutiginnereermat, paaserusuppara tamatuma aaqqiiviginissaanut Naalakkersuisut suliniuteqarnersut aammalu ukiuni tulliuttuni sisamani kr. 2 mio. matussuserniarlugit suliniuteqarniarnersut.

Kissaatigaara apeqquteqaatikka ullut suliffiusut qulit qaangiutinnagit akineqassasut.