Nualluutip siaruaalluarnissaannut matoq ikersinneqaannarani qiversivillugu ammarneqarpoq. Nunarsuup sinnerani tunillaasuutsinnginnissaq siunertaralugu maleruagassanik sakkortusiinerit ingerlanneqartut, nunatsinni killormorluinnaq juullikkunni inuillu pisarnermiit angalaneruffianni, angallannikkut killilersuutinik atorunnaarsitsisoqarpoq
All.: Vivian Motzfeldt, Inatsisartunut ilaasortaq, Siumut
Nunarsuup sinnerani nunat peqqussutinik sukaterileruttorfianni nunatsinni Naalakkersuisut killormorluinnaq juullikkunni, inuillu pisarnermiit angalaneruffianni, angallannikkut killilersuutinik atorunnaarsitsiniarput. Decemberip ulluisa 25-anit Januarip pingajuata tungaanut nunatsinni Nuummiit illoqarfinnut nunaqarfinnulluunniit angalaniaruit misissorteqqaarsimanissaq piumasaqaataassanngilaq, naak Nuummi annertuumik tunillaassuuttoqaraluartoq.
Taamaalilluni nualluutip siaruaalluarnissaannut matoq ikersinneqaannarani qiversivillugu ammarneqarpoq. Tamanna ernumanarpoq akuersaarneqarsinnaananilu.
Nunarsuup sinnerani tunillaasuutsinnginnissaq siunertaralugu maleruagassanik sakkortusiinerit ingerlanneqarput – tassami coronap allannguutaa, omikron, siuliani takusimasatsinnit tamanit tuniluutianeruvoq. Nakorsaanerup oqarneratuut, piffissaq apeqqutaaginnarpoq allannguutip tamassumap qaqugu nunatsinnut tikinnissaa. Taamaammat juullip ukiutoqqallu nalaani, iliuusissatut siunniunneqartut pissutsinut naapertuutinngilluinnartut Siumumi isumaqarpugut.
Iliuutsilli ataqatigiinngitsut uparuarneqartariaqartutut inissisimasut ajoraluartumik taakkuinnaanngillat – Nuuk tuniluuffiunerpaatut massakkut inissisimasoq angallannikkut nakkutigineqanngitsumik juullip ukiutoqqallu akornanni inissisimasussanngorpoq.
Qallunaat nunaanni tuniluunneq ima annertutigaaq, naatsorsuutigineqarluni tunillatsittut ullormut 8.000-init 40.000-inut qaffassasut. Nunatta avataaniit nunatsinnut tikittartut amerlanersaat Nuummut ingerlasuusarput – Tuniluunnerlu nunatta sinneranut aammalu inoqarfinnut isorliunerusunut aqunneqanngitsumik akuersaaginnarneqartutullu nipeqartillugu, nunatsinnilu sumiiffiit ilaanni peqqussutit paasiuminaatsumik qaffasissorujussuarmik inissisimatinneqartillugit, Nuummi qasukkaaneq Siumumit assut ernumanartoqartillugulu naammaginngilarput.
Peqqissutsimut Naalakkersuisoq; nunap inuisa naatsorsuuteqarfigaatsit, nunap inui assigiinngisitsiffiunngitsumik tamaasa illersussagitit ernumanerli sakkortusiartortoq Siumumit isiginnaartuuffigiinnarsinnaanngilarput – Iliuuseqartoqartariaqarpoq.
Maskiinarujussuaq Coronap nunatsinnut tikinnissaannut nukippassuit atorlugit piareersarfigineqarsimasoq iluatsinnerusariaqarpoq. Ataqatigiittumik tuniluuttoqarneratigullu aqunneqarsinnaasumik ingerlatsisoqassasoq Naalakkersuisut qulakkiigassaraat.