Ilaqutariit
Ilaqutariit nukittuut peqqissullu — meeqqat pitsaasumik inuuneqarnissaat qulakkeeqqullugu.
Ilaqutariit inuiaqatigiinni qitiupput. Angajoqqaat meeqqallu, meeqqap peroriartornerani ataatsimoortuarnissaat qitiutillugu, ilaqutariit susassareqatigiinnerlu pillugit politikissamik nutaamik pilersitsisoqassaaq. Tamatumani aamma nunani sanilerisatsinni misilittakkat iluatsilluartumik kinguneqarsimasut isumassarsiorfigineqassapput.
Siumup sulissutiginiarpaa meeqqat angerlarsimaffiup avataanut inissinneqartartut ikilisarneqarnissaat. Siumup sulissutigissavaa ilaqutariit avissaartinnagit ataatsimoorluni ikiorserneqarfiusinnaasumik sakkussanillu aallerfiusinnaasumik pilersitsinissaq. Siumup pingaartitaraa ilaqutariit nukittuut peqqissullu pilersinneqarnissaat.
Ilaqutariit tunngavissinneqassapput meeqqat inuunerminni aallartilluarsinnaaqqullugit, tamannalu piviusunngortinneqassaaq Inatsisartut, Naalakkersuisut, kommunit, kattuffiit, angajoqqaat susassaqartullu allat tamaasa suleqatigiinnerisigut.
Angajoqqaat meeqqamik atugarisaannut akisussaanerpaapput. Angajoqqaat perorsaanikkut sumiginnaasarnerat pillugu periusissiamik nutaamik suliaqartitsinissaq anguniarneqassaaq, peqatigiilluta ajornartorsiutip qaangerneqarnissaata suleqatigiissutiginissaa kinguarsaqqinnagu piniassammat.
Peqatigisaanik ilaqutariinnik ataatsimoortitsilluni sullissineq nukittorsarneqassaaq, ilaatigut ilaqutariinnut højskolertitsisarnerit nutaamik annertusarlugit ingerlatiinnarneqarnerisigut piorsaaffiginerisigullu.
Ilaqutariit siunnersorneqarnissamik pisariaqartitsisut piaartumik ikiorneqartarnissaat Siumup aqqutissiuutissavaa, taamaasiornikkut meeqqanik angerlarsimaffiup avataanut inissiisarneq aamma annikillisarneqarsinnaaqqullugu.
Ilaqutariit siunnersorneqartarnerat pitsaanerusunngorlugu ingerlaqqittariaqarpoq, tamatumunnga naammattunik ukiut tamaasa aningaasaliisoqartarnissaa qulakkeersimajuartariaqarluni.