Ilaqutariit inuiaqatigiinni qitiupput. Angajoqqaat meeqqallu, meeqqap peroriartornerani ataatsimoortuarnissaat qitiutillugu ilaqutariit susassareqatigiinnerlu pillugu politikissamik nutaamik pilersitsisoqassaaq. Tamatumani aamma nunani sanilerisatsinni misilittakkat iluatsilluartumik kinguneqarsimasut isumassarsiorfigineqassapput.
Siumup sulissutiginiarpaa meeqqat angerlarsimaffiup avataanut inissinneqartartut ikilisarneqarnissaat. Siumup sulissutigissavaa Ilaqutariit avissaartinnagit ataatsimoorluni ikiorserneqarfiusinnaasumik sakkussanillu aallerfiusinnaasunik pilersitsinissaq. Siumup pingaartitaraa ilaqutariit nukittuut peqqissullu pilersinneqarnissaat.
Ilaqutariit tunngavissinneqassapput meeqqat inuunerminni aallartilluarsinnaaqqullugit, tamanna piviusunngortinneqassaaq Inatsisartut, Naalakkersuisut, kommunit, kattuffiit, angajoqqaat susassaqartullu allat tamaasa suleqatigiinnerisigut.
Angajoqqaat meeqqamik atugarisaannut akisussaanerpaapput. Angajoqqaat perorsaanikkut sumiginnaasarnerat pillugu periusissiamik nutaamik suliaqartitsinissaq, peqatigiilluta ajornartorsiutip qaangerneqarnissaata suleqatigiissutiginissaa kinguarsarneqaqqissinnaanngitsoq Siumut isumaqarpoq.
Peqatigisaanik ilaqutariinnik ataatsimoortitsilluni sullissineq nukittorsarneqassaaq, ilaatigut ilaqutariinnut højskolertitsisarnerit nutaamik annertusarlugit ingerlatiinnarneqarnerisigut piorsaaffiginerisigullu.
Ilaqutariit siunnersorneqarnissamik pisariaqartitsisut piaartumik ikiorneqartarnissaat Siumup aqqutissiuutissavaa, taamaasiornikkut meeqqanik angerlarsimaffiup avataanut inissiisarneq aamma annikillisarneqarsinnaaqqullugu.
Ilaqutariit siunnersorneqartarnerat pitsaanerusunngorlugu ingerlaqqittariaqarpoq, tamatumunnga naammattunik ukiut tamaasa aningaasaliisoqartarnissaa qulakkeersimajuartariaqarpoq.