Siumut Folketingimi danskit aningaasaqarnermut inatsisiani suliniutiik arlallinnik angusaqarpoq. Kisiannilu Aki-Matilda Høegh-Damip aningaasaqarnermut inatsit pillugu isumaqatigiinniarnerit ingerlanneqarnerat isornartorsiorpai.
Danskit aningaasaqarnermut inatsisaannut isumaqatigiinniarnerit piffissaq kingulleq ingerlanneqarput. Siumup ilaasortaa Folketingimi, Aki-Matilda Høegh-Damip suliniutit qulit isumaqatigiinniarnerniit anguai assullu naammagisimaarlugit.
Danskit naalakkersuisut Siumup Folketingimi ilaasortaalu Aki-Matilda Høegh-Dam danskit aningaasaqarnermut inatsisianut isumaqatigiinniarnerit ingerlanneqarmata qanimut suleqatigiissimapput.
Kalaallit Nunaannut Savalimmiunullu ukiumut aningaasaliissutit aqqutigalugu isumaqatigiinniarnerit Aki-Matilda Høegh-Damip suliniut arfineq-sisamat qulakkeerpai,katillugit 39 millionit koruuniupput, ukiuni sisamani agguataarneqartartussat. Aammattaaq Isumaginninnermut ministereqarfimmi siuliani isumaqatigiinniarnerit ingerlanneqarsimapput, Siumup suliniutit aamma iluatsippai.
”Ukioq manna allaanerulaarpoq, pissutigalugu Folketingimut qineqqusaartoqarnikuugami. Angusagut naunnaarutigigaluarlugit, uparuarparput aningaasaqarnermut inatsimut isumaqatigiiniarnerit ingerlatseriaaserput allannguuteqassagaluartoq, Aki-Matilda Høegh-Dam taama oqarpoq.
”Maanna isumaqatigiinniarnerit ingerlariaasii periarfissaqartitsinngillat sunniuteqarnissamut imaluunniit itisiliinissamut isumaqatigiinniarnerit ingerlanneqarneranni, danskit Kalaallit Nunaanni akisussaaffiit annerit iluanni, assersuutigalugu inatsisinut atuutitsineq”, Aki-Matilda Høegh-Damip uparuarpaa.
Aki-Matilda Høegh-Damip Kalaallit Nunaannut Savalimmiunullu ukiumut aningaasaliissutinut isumaqatigiinniarnerit aqqutigalugit suliniutinut arlalinnut aningaasaliinerit isumannaarpai. Atuagaateqarneq, oqaluttuarisaaneq, atuagassat kalaallisut pissarsiarisinnaanissai, avatangiisinut isumaginninneq, ilinniagaqarneq, inuussutissalerinermut tunngasut akisussaaffik aammattaaq inuussutissarsiornermi ineriartorneq pineqarput.
Maanna aningaasanut inatsit pillugu isumaqatigiinniarnerit ingerlatseriaasia, taaneqartartoq Kalaallit Nunaannut Savalimmiunullu ukiumut aningaasaliissutit killiliisarpoq, suliniutit annerit eqqartornissaannut periarfissaqartinnagu. Taamaattumik Aki-Matilda Høegh-Damip siunnersuutigaa Kalaallit Nunaannit isumaqatigiinniarnerit ingerlanneqarneranni sunniuteqarnerussasoq, periarfissaq qulakkeerniarlugu danskit naalakkersuisut isumaqatigiinniarnissamut, Kalaallit Nunaanni akisussaaffigisaat ajornartorsiutit iliuuseqarnissamut ilusilersornissaannut, Kalaallit Nunaannut Savalimmiunullu ukiumut aningaasaliissutit aqqutigalugu iliuusigineqarallartut atuunnarnagit imaluunniit aningaasaliiffigigallarlugit.
”Suliniutit qulakkeernissai uagitsinnut pingaaruteqarsimavoq, kalaallit suliniutaanut Kalaaallit Nunaanni Kalaallinullu Danmarkimi anguneqassapput. Suliniutit pissutsit kalaallinut piffinni arlallinni kivinneqassapput, tamaat isigalugu naammagisimaarpunga”, Aki-Matilda Høegh-Dam oqarpoq.
Suliniutit allattorsimaffii kakkiunneqartoq takuuk, Siumut aningaasanut inatsit pillugu isumaqatigiinniarneranni qulakkeersimasai.