Allattoq: Siumut Folketingip allattoqarfia
Siumup Folketingimi ilaasortaatitaa Aki-Matilda Høegh-Dam Nunatsinniippoq poorskikkunni.
Aallannginnermini aningaasaqarnermut ministeriaqarfimmiippoq, tassani aningaasaqarnermut ministeri Nicolai Wammen ataatsimeeqatigalugu. Danskit aningaasanut inatsisissaannut isumaqatiginninniarnermi Siumup isumaqatiginninniassutai Aki-Matilda Høegh-Damimit saqqummiunneqarput. Isumaqatiginninniutaasut Kalaallit Nunaannut sunniuteqarluartussat saqqummiuppai.
Nunatsinniinnermini ilinniartitsisut kattuffiannik, IMAK-imik, ataatsimeeqateqarnissamut periarfissinneqarami ataatsimeeqataavoq. Tassani IMAK-imi siulittaasumik Elna Heilmannimik aamma kattuffiup allattoqarfiani pisortamik Simon Lennertimik ataatsimeeqateqarpoq.
IMAK-ip allattoqarfiani Nuummi apriilip 13-ani ataatsimeeqatigai. Ataatsimiinnermi ilaatigut eqqartorneqartunut ilaavoq qanoq ilinniartitsisut soraarninngortut Nunatsinni najugaqaannartarnissaat qulakkeerneqarsinnaanersoq.
Aki-Matilda Høegh-Dam Københavnimut sapaatip akunnerani matumani uterpoq. Tassani danskit aningaasaqarnermut inatsisissaannut isumaqatiginninniaqqippoq. Aningaasaliissutissat ’Nordatlantisk pulje’-mik taaneqartarpoq, danskit aningaasanut inatsisaannit aningaasat aaneqartarlutik. Aningaasaliissutit 20 millioner koruuninit 30 millioner koruuninut amerlineqarnikuupput, aningaasaliissutillu Kalaallit Nunaannut aamma Savalimmiunut aningaasaliissutaassapput.
Aningaasanut inatsisissamut pingajussaa isumaqatiginninniartoqaqqissaaq, tamanna sapaatit akunnerini tulliuttuni ingerlanneqarumaarpoq. Aningaasanut inatsisissamut suut Siumumit anguniarneqarnersut tusagassiutinut nalunaarutigineqarumaarpoq.
Taakku suliat saniatigut Siumup Folketingimi allattoqarfia ulapaarnikuuvoq. Tassami Folketingimi allaffimmut allamut allattoqarfik nuuppoq.
Aki-Matilda Høegh-Damip aamma Siumup Folketingimi allattoqarfia Den Sorte Diamantip ungasinngisaani, Folketingimiittumi, nutaamik allaffeqalerpoq.