Allattoq: Siumut Folketingip allattoqarfia
Danskit aningaasanut inatsisissaat ukiormanna atuuttussaq isumaqatiginninniutigalugu naammassineqarpoq sapaatip akunnerani matumani.
Nunat avannarlernut aningaasaliissutaasartut aqqutigalugit Siumup Folketingimi ilaasortaatitaa Aki-Matilda Høegh-Dam arlariinnik isumaqatiginninniarnernit angusaqarpoq. Ukiuni sisamani tulliuttuni 39 millioner koruuninut agguaattussanngorlugit suliniutit qulingiluat aningaasaliiffigineqartussanngorput. Taakku saniatigut Danmarkimi Socialministeriaqarfimmi aamma angusaqartoqarpoq.
Isumaqatiginninniarnernit Siumumit anguneqartut
Kikkut tamat oqartussaaqataanerannut tunngassuteqartumik piviusulersaarusiornissaq
Kalaallit Danmarkimi ilinniagaqartunut kollegialiortitsinissat
Operation Dagsværk INUA-mut aningaasaliineq
Nunatsinni imaatigut angallannerup isumannaannerulernissaa
Nunatta kujataani Foodlab-imik pilersitsineq
ICC-mut aningaasaliineq
Inatsisit pillugit sulinermi kalaallisut oqaatsit atorneqalernissaat
Mentor Immanuelimut aamma MAPI-mut aningaasaliineq
Atuakkap ‘Imperiets Børn’-ip kalaallisut nutserneqarnissaa
Naak aningaasanut inatsimmut angusarpassuaqaraluarluni Aki-Matilda Høegh-Dam aningaasanut inatsimmut isumaqatiginninneriaaseq isornartorsioqqippaa.
Maanna aningaasanut inatsit pillugu isumaqatigiinniariaaseq, taaneqartartoq Kalaallit Nunaannut Savalimmiunullu ukiumut aningaasaliissutit, killiliisarpoq. Suliniutit annerit eqqartornissaannut periarfissaqartinnagu. Taamaattumik Aki-Matilda Høegh-Damip siunnersuutigaa Kalaallit Nunaannit isumaqatigiinniarnerit ingerlanneqarneranni sunniuteqarnerussasoq, periarfissaq qulakkeerniarlugu danskit naalakkersuisut isumaqatigiinniarnissamut, Kalaallit Nunaanni akisussaaffigisaat ajornartorsiutit iliuuseqarnissamut ilusilersornissaannut, Kalaallit Nunaannut Savalimmiunullu ukiumut aningaasaliissutit aqqutigalugu iliuusigineqarallartut atuunnarnagit imaluunniit aningaasaliiffigigallarlugit.
Aningaasanut inatsisip isumaqatiginninniutigineqarnera saniatigut Aki-Matilda Høegh-Dam sapaatip akunnerani matumani ulapaarpoq.
Nunat tamalaat tusagassiorfiit kattuffiata nunat avannarlernut tunngatillugu tusagassiortunik katersortitsineranut peqataavoq.
Nunanit tamalaaneersunik tusagassiortunit apersorneqarpoq, tassani Siumup politikkia kiisalu Kalaallit Nunaat pillugu apeqqutigineqartut Aki-Matilda Høegh-Dam-imit akineqarlutik sisamanngormat.
DR Byenimiipportaaq tallimanngormat. Tassani radiokkut ullaakkut aallakaatinneqartartumi ’P3 Go’ Morgen’-imi peqataavoq, tassani Kalaallit Nunaata naalagaaffinngornissaanut tunngasunik kiisalu Tunngaviusumik inatsisissatut siunnersuutip, tallimanngornermi saqqummiunneqartumut, tunngatillugu isummani saqqummiullugit. Tunngaviusumik Inatsisissatut siunnersuut Nuummi tallimanngornermi saqqummiunneqarpoq.